Аз же тогда, поставивъ кандило на Гробе Святемь, и поклонився честному Гробу тому, и облобызавъ место то святое с любовию и съ слезами, идеже лежало тело Господа нашего Исуса Христа, изидох из Гроба Святаго с радостию великою и идохъ в келию свою.
Заутра же в Великую суботу въ 6 час дне сбираются вси людие пред церковь Святаго Въскресениа — бесщисленое множьство народа, от всех странъ пришелци и тоземци: и от Вавилона, и от Египьта, и от всех конець земли. Ту ся сбирають во тъ день несказанно множьство. И наполнятся вся та места людий около церкви и около Распятиа Христова; и велика теснота и томление люте людемъ ту бываеть; мнози бо человеци ту задыхаются от тесноты людий бещисленных. И ти людие вси стоятъ съ свещами не вожженами и ждуть отврьзениа дверий церковных. Внутрь же церкви тогда токмо попове едини суть. И ждуть попове и вси людие, дондеже прииде князь съ дружиною; и тогда бывает отврьзение дверемъ церковным, и входять людие въ церковь в тесноте велице и въ гнетении, и наполняють церковь ту. И полати вси полны будуть, не могуть бо ся вместити вси людие въ церковь ту, но ту стоять вне церкви людие мнози зело около Голгофы и около Краниева места и дотуда, идеже кресты налезени; и все то полно будеть людий бе-щисла много множьство. И ти людие вси въ церкви и вне церкве иного не глаголють ничтоже, но токмо «Господи, помилуй!» зовут неослабно и вопиють силно, яко тутнати и гремети всему месту тому от вопля людий тех. И ту источници слезам проливаются от верных людий. Аще бо кто окаменено сердце имат, но тогда можеть прослезити. Всякъ бо человекъ зазрит в себе тогда, и поминаеть грехи своя, и глаголеть в собе всякъ человекъ: «Еда моих деля грехов не снидет свет святый?» И тако стоать вси вернии людие слезни и скрушенным сердцемъ. И тъ самъ князь Балъдвинъ стоитъ съ страхом и смирениемъ великим, источници проливаются чюдно от очию его. Такоже и дружина его около его стоятъ прямо Гробу, близь олтаря великаго, вси бо сии стоят съ смерением.
И яко бысть 7 час дне суботнаго, тогда поиде Балъдвинъ князь ко Гробу Господню и з дружиною своею из дому своего, и вси бо сии пеши. И присла въ метохию Святаго Савы[231] и позва игумена того Святаго Савы и съ черници его. И поиде игуменъ с братиею къ Гробу Господню, и азъ худый ту же поидох съ игуменом темъ и з братиею. И приидохом ко князю тому и поклонихомся ему вси. Тогда и онъ поклонися игумену и всей братии и повеле игумену Святаго Савы и мне худому близь себе поити повеле, а иным игуменом и черньцем всем повеле пред собою поити, а дружине своей повеле позаду поити.
