Грамота полоцкого князя Изяслава жителям Риги о свободной торговле (около 1265 г.)
«Слово Изяслава, князя полочьского, к епископу и к местеру и к всемь вельневицем и ратьманом, всем горожаном.
Полотеск Видьбеск одно есть, а воли есми Божий и в Войшелгове. А Изяслав со мною одно. На семь къ мне целовати крест в правду, любовь имети и мир, как было при первых князъях полочьскы(х). Полочаном видьбляном волное торгованье в Ризе, на Готьском бере(зе) и в Любьце. А рубежа не деяти. А кому с кым тяжа, суд дати без перевода. А суженого не посуживати. А где кому годно, ту тяжеться. Поручники, и долъжникы, и холопы выдати. А што ся в рать деяло, и в рубежех, про то вам не мыцати, ни нам вам мещати. Чего ся есме отступили в Ризе, к тому вам не приискывати ни людей, ни земли, ни воды, ни борти.
На семь же целуйте ко мне крест по любьви в правду без всякого извета».
Договорная грамота полоцких и рижских купцов об условиях торговли
«1405 г. июня 21
А се мы, полочане, вси добрый люди и малый, надеючесь на Бога, св. Софея милость и князя Великого Витовта здоровье, хочем с тобою, княжь местерю, любовь держати и с твоею братьею, со всеми ридели. Також хочем с вами, ризькии ратьмяне, и со всеми ризькии купьци межи себе приязньство держати и любовь на обе стороне крепко.
Вам нашего полочанина стеречи, как своего брата немчина у Ризе; а нам, полочаном, вашего немчина также по томуж стеречи у Полотьсце.
А торговати по старому закону всякую торговлю, купити, продати. Купити вам, немцем, у нас, у Полотьсце, немецькому купьцю полберьковеска воску, полтысячи белкы.
А торговати немецькому купьцю с гостем Литовьское земли добровольно. А с новьгородци немецькому купьцю торговати, а промежи има ходити нашему полочанину: занеже нас новьгородци не пустять у Немечькии двор торговати без своего новьгородца. А с москвичи торговати вашим немьцем; также нашему полочанину межи ими ходити, торговати; занеже на нас москвичи тамьгу емлют.
А восковыи вес держати по старому закону, штоже наш берьковеск восковыи болши вашего берьковеска полупудом ризького весу.
А серебрыныи весы ризькии держати болши полочькиих весов серебрыных полузолотником.
А соль весити пудным ременем; а берковеск солоныи учинити у восковыи берьковеск; а белка купити, а намет давати, а у двор не имати.
А мимо г. Польтеск немецькому купьцю не ходити, торговати немьцем у Полотьсце. А малое вам торговли не купити у Полотьсце порозничи.
А корьчмы вам у нас у Полотьсце не держати.
