И тако вси людие стоят съ свещами горящими, и вопиють вси людие велегласно «Господи, помилуй!» съ радостию великою и с веселием. Така бо радость не можеть быти человеку, ака же радость бываетъ тогда всякому християнину, видевши светъ Божий святый. Иже бо не видевъ тоа радости въ тъ день, то не иметь веры сказающим о всемъ том видении. Обаче мудрии и вернии человеци велми верують и въсласть послушають сказаниа сего и истины сеа и о местех сих святыхъ. Верный в мале и во мнозе веренъ есть, а злому человеку неверну истина крива стваряються. Мне же худому Богъ послух есть и Святый Гробъ Господень и вся дружина, русьстии сынове, приключьшиися тогда во тъ день ногородци и кияне: Изяславъ Иванович, Городиславъ Михайлович Кашкича и инии мнози, еже то сведають о мне худомъ и о сказании семъ.[233] Но възвратимся на прежереченную повесть.
Егда же светъ восия въ Гробе Святемъ, тогда же и пение преста, и вся возпиша «Кирие, ейлеисонъ» и поидоша въ церковь съ свещами горящими и с радостию великою, сблюдающи свещи свои от угашения ветреняго, и идоша кождо их въ свояси. И от того святаго света вжигают кандила въ своих церквахъ и канчивають пение вечернее дома. А в велицей церкви, у Гроба Госоподня, сами попове едини, безъ людий, канчивають пение вечернее. Тогда и мы съ игуменом и съ братиею въ свой манастырь идохом, несуще свещи горящи, и ту кончахом пение вечернее, и идохом в келии свои, хваляще Бога, показавша недостойным нам ту благодеть Божию видети.
И на утрени въ Святую неделю, отпевше заутренюю и бывшю целованию съ игуменом и съ братиею, и отпущению бывшю въ 1 час дне, и вземше крестъ, игуменъ и вся братия, идодхом къ Гробу Господню, поюще кондакъ[234] сий: «Аще и въ гробъ сниде, безмертне». И вшедше в Святый Гробъ животворящий, и облобызавше Святый Гробъ Господень с любовию и со слезами теплыми, и насладившеся ту благоуханныя воня тоя Святаго Духа пришествиемъ; и кандилом темъ еще горящим светло и чюдно. Та бо 3 кандила бяху вожьглися тогда, якоже поведа ны иконом и ключарь Гроба Господня. Ко игумену глаголаста оба: «Доле стаащеа на Гробе Господни, та 3 кандила възгорестася». А иных 5 кадилъ виситъ над Гробомъ; но горяху тогда; светъ ихъ инакъ бяше, не якоже онехъ 3-хъ кадилъ, изрядно и чюдно светится.
И потомъ изыдохомъ из Гроба въсточными дверми, и вшедше въ великый олтарь, и ту створивше целование съ правоверными, и бывшу отпущению, игуменъ же и братиа, изыдохомъ изъ церкви Святаго Въскресения и идохомь во свой манастырь, и ту опочивше до литургии.
