И есть же от Назарефа до села Исавова 5 верстъ.
О КАНИ ГАЛЕЛЕЙСТЕЙ
А от села того до Кана Галилеи полторы версты. Кана Галия же есть на людском пути, и ту Христос воду в вино преложи. И ту обретохом дружину многу, идущу въ Акру, и пристахомъ к ним съ радостию великою, идохом с ними въ Акру.
Акра же град[227] есть был срациньский, нынеже фрязи[228] держать. Есть же градок-отъ Акра на Велицем мори, и лимень под нимь добръ велми. Всем обиленъ есть градок. А от Назарефа до Акры есть верстъ 28 великих, есть же Акра к полудню лиць от Назарефа. И ту пребыхом во Акре 4 дни, и опочивше ту добре, и обретохом дружину многу, идущю въ святый град Иерусалимъ, и пристахом къ дружине той и поидохом с ними с радостию, веселящеся, и придохом в Каифу. А оттуда идохом къ горе Каръмильстей, и туда идохом. И ту есть в горе той пещера святого Илии пророка. И ту поклонихомся, а оттуда идохом в Капернаум. А от Капернаума приидохом в Кесарию Филипову. И туда есть путь все ити подле Великое море по полю, а другое по песком оли до Кесария. Ту пребыхом 3 дни въ граде томъ Кесарийстем. И ту есть былъ Корнилие, егоже Петръ апостолъ крестилъ.[229] А от Кесариа идохом в Самарию: налево от Кесария в Самарию путь есть в горы; есть верстъ 20 от Кесария до Самарии. И быхом другаго дне полудне в Самарии. Но по тиху идуще и зноа ради, и не можаху людие пеши ходити въ зной. И ту нощь прележахом пред градом темъ Самариею у кладязя Ияковля, идеже Христос беседова съ женою самарянынею.
О ЕРУСАЛИМЕ
И оттуда, вставше, поидохом путем своим, имже бяхом пришли изъ Ерусалима. И доидохом святаго града Иерусалима с радостию великою по здраву.
Ничтоже зла не видехом на пути сем, но все добро показа намъ Богъ видети очима своима, вся святаа та места. Куда Христос Богъ нашь походил нашего деля спасения, туда же и нас грешных сподоби походти и видети святаа та места. И чюдную ту землю Галилейскую видехом очима своима, всю землю Палестину Богъ сподоби мя обиходити. И Божиею благодатию храними, и походихом бес пакости, молитвами святыя Богородица съблюдаеми; и походихом всю Палестиньскую землю. Та бо земля вся зовется около Иерусалима Палестина.
Божиею помощию укрепляем, походих места та святаа, не видъх нигдеже поганых, ни лютаго звери, ни пригоди ми ся видети иного зла ничтоже, ни немощи малы не почютих в теле моем; но всегда, яко орелъ облегчеваем, Божиею благодатю съблюдаем и силою Вышняго укрепляемъ. Аще и похвалити ми ся подобает, но силою Христа своего похвалюся; о немощи же моей похвалюся: «Сила бо моя в немощи свершается»,— апостолъ глаголеть Павел.
