написах стены твоя, Иеросалиме, и вселюся посреде тебе».
[449]Уготоваем, яко и горъницю, смерением душа наша, да причастием внидеть в ны Сын Божий и Пасху с ученики своими створить. Поидем с идущим на страсть волную, възмем крест свой претерпением всякоя обиды, распьнемъся браньми к греху, умертвим похоти телесныя, въскликнем: «Осана в вышних! Благословен еси пришедый на муку волную, еюже ада попра и смерть победи!», дозде же слово окративше, песньми, яко цветы, святую церковь веньчаем и праздник украсим; Богови хвалословление въслем и Христа, Спасителя нашего, възъвеличим, благодатью Святаго Духа осеняеми, да радостьно праздновавше, в мире достигнем тридневнаго въскресения Господа нашего Исуса Христа, емуже подобаеть всяка слава, честь, держава и покланяние с Отцемь и с пресвятымь и благымь и живоворящим Духомь всегда и ныня и присно и в веки.
ТОГО ЖЕ ГРЕШНАГО МНИХА СЛОВО О РАСЛАБЛЕНЕМЬ, ОТ БЫТИЯ И ОТ СКАЗАНИЯ ЕВАНГЕЛЬСКАГО, — В НЕДЕЛЮ 4 ПО ПАСЦЕ
Неизмерьна небесная высота, ни испытана преисподняя глубина, ниже сведомо Божия смотрения таиньство, велика бо и неиздреченьна милость его на роде человечьстемь, еюже помиловани быхом. Того ради должьны есмы, братие, хвалити и пети и прославляти Господа Бога и Спаса нашего Исуса Христа, исповедающе великая его чюдеса, елико же их створи, неисповедима бо суть ни ангелом, али нъ человееком.
Ныня же о раслабленемь побеседуим, егоже днесь сам Бог въспомянул[450] и призрел и помиловал, егоже и врачеве небрегома створиша, егоже презряху въметающеи в купель, егда бо възмутяшеться вода, вьси, о богатых пекущеся сдравии, сего отреяху, егоже ныня Христос, благый человеколюбець, словомь ицели, врачь бо есть душам нашим и телом, и слово его деломь бысть.
Глаголеть бо евангелист: възиде Исус в Иеросалим в преполовление жидовьска праздьника,[451] егда же множьство народа от всех град по обычаю събирахуться в Иеросалим. Тъгда и Господь приде, всячьскы угажая своим рабом и неистовьство противьных обличая июдей, поистине бо приде, ища заблужьших и спасти погыбъших. Многа бе по всей Палестине створи чюдеса, и не веровахуть ему, нъ противу благодати хулять, лестьца его и блазнителя нарицающе.[452] Того ради при мнозе приде народе к Силуамстей вододьрьжи, иже нарицаеться Вифезда, сиречь Овьча купель[453] (понеже ту полоскаху жьртвьных овець утробы). Над сим бе храм, пять притвор имея, и ту лежаше множьство болящих, хромых же и слепых, и инеми недугы болящеи, чающе движения воде; ангел бо Господень приходя възмущаше воду, и по возмущении первое вълезый цел бываше.
