Днесь Аньна и Каияфа[443] негодуеть. Всем радость и вселье, сима же — скорбь и смущенье. Подобаше иерейску чину расудну быти и пророки пытати, егда се есть Христос, о немже заповеда Ияков сыном своим, глаголя: «От племене твоего, Июдо, изидеть владыка небеси и земли, и тъ упование языком, привязая лозе жребя свое»;[444] ни помянуша Давыда, о немже пророчьствова, глаголя: «Из уст младенець съсущих свершил еси хвалу»,[445] ни разумеша Софонья чтуща, писавша тако: «Веселися, Еросалиме, и уравнай путь Богу твоему, яко придеть в церковь свою, творяй чюдеса и дая знамения»,[446] нъ свет творяху на благодателя, да не токмо Исуса, но и Лазоря погубять, и не хотеша с народы глаголати тако: «Велий еси, Господи! Глас твой потрясе адова скровища и исторже от внутрениих душю умершаго, и изиде Лазарь паки на бытье спасен!»
Днесь тварь веселиться, свобожаема от работы вражья, и адьская врата и верея потрясошася и бесовьския силы ужасошася. Днесь горы и холми точать сладость, удолья и поля плоды Богови приносять, горнии въспевають и преисподняя рыдають, ангели ивяться, видящи на земьли невидимаго на небесех и на жребяти седяща сущаго на престоле херувимьсте, обиступаема народы неприступнаго небесным силам. Ныня младеньци радостно хвалим бываеть егоже серафими в вышних страхом славять. Ныне путь съшествуеть в Еросалим измеривый пядью небо и землю дланью, в церковь входить невъместимый в небеса.
Днесь старейшина жречьский гневаеться на творящаго великая чюдеса, книжници и фарисии детем завидять, с ветми на сретенье Христу текущим и зовущим: «Осана сыну Давыдову!» Чудны вещи! Како забыша пророк, писавъших о Христе всяко нашего ради язычнаго спасения! «Уже бо, — рече, — несть ми хотенья в сынех Израилевых, яве бых не ищющим мене и рку не людем моим: “Людье мои вы есте”».[447]
Темьже, братье, подобаеть нам, яжо Божиим сущим людем, възлюбившаго нас Христа прославити. Придете, поклонимъся ему и припадем, яко блудница, мыслено того пречистеи лобызающе нозе;[448] останем же ся, яко она, от злых дел; излеем, якоже мюро на главу его, веру и любовь нашю; изыдем любовью, яко народи, в сретение ему и сломим гневодержание, яко и ветви; постелем ему, яко и ризы, добрыя детели; въскликнем молитвами и безлобьем, яко младеньци, предъидем милостынями к нищим, вследуем смирением, постом и бьденьем — и не погубим труда четырьдесятьдньвьняго поста, в няже подвизахомъся, очищающеся от всякоя скверны, да в нашь Иеросалим внидеть ныня Христос. Нашего бо телесе ставленье Иеросалим речеться, якоже Исая глаголеть: «На руку
