Предобро народа послушьство, емуже языци и веровавъше, Сына Божия познаша и. В жидех бо чюдеса створи, а языком спасение и благодать дарова. Они его не познаша, а языци прияша и. Израиль отречеся позвавшаго его в вечную жизнь, а языци веровавъшая в небесное царство въведе. Овем паденье, соблазн, а странам вера, въстанье.
Днесь апостоли на жребя своя ризы възложиша,[437] и Христос верху их седя. Оле преславныя тайны явленье! Хрьстьяньския бо добродетели апостольския суть ризы, иже своим ученьем благоверныя люди престол Богови и вместилище Святому Духу створиша: «Вселю бо ся, — рече, — в ня и похожю, и буду им Бог, и ти будуть мне люди».[438]
Днесь народи постилають по пути ризы своя, друзии же от древа резаху ветве постилаша.[439] Добр убо и прав миродержителем и всем вельможам Христос бысть, егоже милостынею и безлобьем постлавше, нетрудьно входять в небесное царство. Ломящеи же от древа ветви рядници суть и грешьници, иже скрушеным сердцемь и умилениемь душа, постом же и молитвами свой путь равняюще, к Богови приходять: «Аз бо, — рече, — есмь путь, истина и живот».[440]
Днесь предъидущии и въследующеи въсклицають, глаголюще: «Осана сыну Давыдову! Благословен грядый во имя Господне!»[441] Предъидущеи же суть пророци и апостоли: они же преже прорицавше о Христове пришествии, а си проповедавъше во всем мире Бога пришедша и во имя его крестящеи народы. А въследующеи святители суть с мученики: ови с еретики крепко по Христе борющеся и тех яко враги от церкве издреюще, си же до крове за имя Христово пострадавша и вся уметы створиша, въслед его текоша, да причастници будуть страсти его. Вси же «осана» възываху, рекуще: «Ты еси Сын Божий, въплотивыйся на земли, да Адама преступленьем падша въздвигнеши; благословенья деля и мы потщимъся добрая творити дела во имя Господне».
Днесь весь Иеросалим подвижеся въшествия ради Господня: старци быстро шествоваху, да Исусу яко Богу поклоняться; отроци скоро течаху, да и прославять о чюдеси Лазорева въскресения; младеньци, яко крилати окрест Исуса паряще, вопияху: «Осана сыну Давыдову! Благословен грядый во имя Господне! Бог Господь и явися нам!»[442] Оле тайн откровение и пророческих писаний раздрешение! Старца бо язычьския наменуеть люди: преже бо Аврама и Израиля языци суть; тогда, прельщени, от Бога уклонивъшеся, ныне же Сыну Божию верою покланяються. Образ же отрок всьчестьный, девство любящий, отческый чин нарече, беспрестани славящим Христа и чюдеса Божиею благодатию сътворяющим. Младеньци же вся хрестьяны прообрази, иже ничтоже пытають о Христе, но о томь живуще и за того умирающе, и тому обеты и молитвы въздающе.
