Си же глаголя, не величаюся, но себе теша, от неразумиа глаголю, человек бо есмь грешен, кален уд имея мой язык. Аще бо в глубину Божиих книг внидох, но грубом языком ума просты изношю глас. Бог же мира многою милостию да створит вашему отчьству сему прияту быти сказанию; и тъй ваша съблюдеть душа чиста, и телеса бескверньна, и житие непорочно, девьство неокрадомо, непретыкающееся чернечьство, несъблазньну веру, непременно о души попеченье, братолюбье нелицемерно, и вашь покой украсить знаменми, и небесныя отверзеть двери, и огненое отложить оружье, и в горний ведеть в Иеросалимь, и десницею венчаеть, и трапезу представить, и чашу веселиа и радости подасть.
Мене же, акы пса, молю вы, не презрите, но и сде в святых помянете молитвах и тоя святыя трапезы крупице поверзете, еяже буди всем крестьяном сподобитися, — жизни о Христе Исусе, Господе нашем емуже слава с Отцем и с Святым Духом и ныне и присно и во веки веком.
В НЕДЕЛЮ ЦВЕТНУЮ
[433] О СКАЗАНИИ ЕВАНГЕЛЬСТЕМЬ СВЯТАГО КИРИЛА
Велика и ветха скровища, дивно и радостьно откровение, добра и силна богатьства, нескудно ближним даемии дарове, славна и зело честьна дому искуснии строители, обилны и преполнены царское трапезы мнози отстатци, от нихже нищии препитаеми бывають, — не гиблющею ядью, но пребывающею в живот вечьный! Словеса бо евангельская пища суть душам нашим, яже Христос многообразно глагола человеческаго ради спасения. Его же славьный и честный дом — Церкви имееть искусны строителя: патриархы и епископы, ерея же и игумены, и вся церковныя учителя, иже верою и чистотою ближнии Богу створишася и приемлють Святаго Духа благодатью различныя дары ученью и целению по мере дара Христова. Тем же и мы, убозии, тоя же тряпезы останков крупице въземлющеи, насыщаемься, киждо бо раб своего господина хвалить.
Радость же нам, братье, днесь и веселье всему миру пришедшаго ради праздника, о немьже пророческая писанья сбытье прияша, творимаго ради в онь Христомь знаменья. Днесь Христос от Вифанья в Ерусалим въходить, всед на жребя осля,[434] да пророчьство Захарьино сверьшиться, иже рече о нем: «Радуйся зело, дщи Сионова: се бо цесарь твой грядеть кроток, всед на жребець ун!».[435] Се убо пророчество разумеюще, веселимся.
Душа бо святых дщери горняго Ерусалима нарицаются; жребя же — иже от язык веровавше в Онь людье, ихже, послав апостолы, и отреши от льсти дьяволя.
Днесь народи противу Исусу изидоша вайя в руках держаща и темь почесть творяще, егда «Лазоря из гроба возва и от мертвых въскреси и́».
