юже Матфей церкви предасть.
Зачало. Рече Господь: «Человекъ некто домовит беаше, иже насади виноградъ, и остени его оплотом, и ископа точило, и остави входъ, створи врата, но не затвори входа. И отходя в домъ свои, «Кого, — рече, — оставлю стража моему винограду? Аще оставлю отъ служащихъ ми рабъ, то сведуще мою кротость, истеряють благая моя. Но сице створю: приставлю ко вратомъ хромца и с нимъ слепца. Да аще кто от врагъ моихъ въсхощеть окрасти мой виноград, то хромецъ убо видить, слепець же чюеть. Аще ли от сею всхощеть внити кто в виноград, хромець убо не имать ногу доити внутрених; слепець же аще поидеть, то заблудивъ в пропастехъ убьеться». И посадивъ я у врат, дасть има власть на всех внешних;[319] пищю же и оденья нетрудну съготова. «Точью, — рече, — внутрениихъ без моего не коснитеся повеленья». И тако отиде, поведевъ има свой по времени приходъ и тогда мьзду стражбы ради обещав има взяти, попрети же и мучениемь, аще его преступита заповедь. Си же до зде оставлеше, паки въсприимем еуаггельское слово, плодъ устенъ на умней тряпезе вашего ока предлагающе.
Ответъ. Человекъ домовит — Бог Всевидец и Вседержитель, створивы вся словомъ, видимая же и невидимая. Домовит же ся именуеть, — яко не един домъ имать, по писанию. Глаголеть бо пророк: «Твоя суть небеса и твоя земля; вселеная и конець ея ты основа».[320] И паки: «Небо ми — престол, а земля — подножие ногама моима». Моисий же пол вод под твердию сказуеть, а Давыдъ превыши небес воду поведуеть. Но смотри в писания, разумеи: везде сы домы Божиа, не токмо в твари, но и в человецехъ. «Вселю бо ся, — рече, — в ня». Яко же и быст: сниде бо и вселися в плоть человечю и взнесе ю от земля на небеса, — да престол есть Божий человеча плоть; на вышнемь же небеси престол его стоить. А еже насади виноград — рай глаголеть: того бо то есть дело. Пишеть бо ся: «И насади Бог рай в едеме». А иже остени его, рече, оплотомъ — своимь страхомъ. «Страхом бо его, — рече пророк, — движется земля, расседается камение, животная трепещють, горы куряться, светила раболепно служать, облаци и вся вздушная тварь повеленая творять». Стена бо — законъ речется. Закон же всему заповедь Божия ест. «Пределъ бо, — рече, — положи и, его же не преидуть, ни обратяться». Остави же вход — сиречь свидения разум: вся бо тварь не преступаеть Божия повеления: «Вся бо, — рече, — от тебе чають: даси имъ пищю въ время». Пища же не брашно речеться, но слово Божие, имь же питается тварь. Глаголеть бо Моисей: «Не о хлебе единомь живъ будеть человекъ, но о всякомъ глаголе, исходящимь из уст Божии». Незатвореная же врата — дивныя Божия твари устроение и над теми божия сущьства познанье. «От твари бо, — рече, — творца разумей: не качьство, но величьство и силу, славу же и благодать, юже творить угажая всемъ вышним и нижнимъ, видимымъ и невидимым. Аще бо и нарицаеться Христос человекомъ, то не образом, но притчею, ни единого бо подобья имееть человекъ Божья. Не сумнить бо ся писание и ангелы человекы нарицати, — но словомъ, а не подобиемь. Аще бо блазняться етери, слышаще Моисея глаголюща: «Рече Бог: створим человека по образу нашему и подобию», — и прилагають к бесплотному тело, не имуще стройна разума, и есть си ересь и доныне человекообразно глаголющим Бога, иже никако не описается, ни меры качьству имать. Но си оставль, о первемь възглаголю.
