Библиотека литературы Древней Руси. Том 4 (XII век) | страница 109



Но обаче престануть в той год ветри и утишатся волны морьскыа, и егда алкион наседит 7 дни, в ты бо точию дни изляжет птичища. Но понеже кормля имь требе другую 7 дний и на возрастание птичищем, великыдаровитый бо Богъ и малому сему животу такову тишину даровал есть во время рождениа его и възраста. Но и ходцы морьстии ведят се, алкионытыя зовуть дни ты. Се бо есть и намъ на поучение, иже просити что от Бога добрых делъ и полезных и спасение когда улучити и снабдети, имже Богъ о бесловесных промышляеть и уставляеть. Нас же деля что не имать сътворити преславно, яко по образу Божию и по подобию быхом, елма же птица деля мала тако велико гордое море дръжиться, посреде зимы тихо стати повелено.

Егда великый Григорий Богословецъ пловяше во Афины, ун сый, навыкнути хотя тех писаний, и ввнезаапу възвеавшу духу бурну и возмутившуся морю, яко разбиватися корабълю, и всемъ живота отчаавшимъся, юноши же рыдающи и вопиющи, яко дивитися всемъ сущим в корабли человекомъ,[300] яко и абие суровства Посидонска свободишяся, рекше, морьскаго; и тако во кроткое земли, Димитры, обитати сотвори, рекше, въ кроткое и тихое земли.[301] Димитра бо земля ся нарицает.

Иже въ глубоку старость глубокаа извеща. На последьнюю бо и глубокою старость написал есть 16 словесъ,[302] яже чюдна и хвалы достойна, яже суть предана церковьному прочитанию за величьство разума и глубину съкровенных ради и дивных словесъ.[303]

Ни саламандръ прованьскый[304] раждеженую на 49[305] всемирный ликъ составльшим[306] в Багдате угаси. Саламандръ есть зверекь, живет же в нутрений Индии, внутреняя же индийскаа, рекше, Средеземлие, в тех местех и в горах живет зверекь той, егоже зовуть саламанръ. Да той тако устроенъ есть от Бога естествомъ: аще въвергнуть и в пещь огнену, то пламен от его угасаеть, самъ же без вреда пребывает. И менит же списатель на 49 раждеженую, то убо вавилонскаа есть пещь, юже раждьже безаконный царь, лукавы паче всеа земли, егда сотвори и постави тело златое, емуже богоносныа дети не поклонишася. Тогда нечестивый тъ цесарь повеле ражьжещи пешь седмь седмицею. Седмь бо седмиць сочетше, обретаемъ 40 и 9. И тако уноши ты в толице не изваришася огни, хладному убо духу тех осиавшу и пламень в росу претворшу. То ти ни саламандръ угаси багдатьскую пущь, рекше, вавилонскую, но ангелъ Божий всемощный, еже есть Христос Богъ, единочадый Сынъ Отчь, посреде пламене верныа те уноши спасе, прохладив смотрением Божиим. Нечестивый той цесарь акы пророчьску дару сподобися, в пещи того видевъ, веща бо предстоащимъ: «