Ища сего потонку, тщеславити ли ся велиши, любимиче?!
Поминаю же пакы реченаго тобою учителя Григориа, егоже и свята рекъ, не стыжюся. Но не судя его хощу рещи, но истиньствуа: Григорей зналъ алфу, якоже и ты, и виту подобно, и всю 20 и 4 словесъ грамоту. А слышиш ты, ю у мене мужи, имже есмь самовидець, иже может единъ рещи алфу, не реку, на сто, или двесте, или триста, или 4-ста, а виту — також.[291] Расматряй, любимиче, расматряти велит и разумети, яко вся состоатся, и съдержатся, и поспеваются силою Божиею. Ни едина бо помощь разве помощи Божиа, ни едина же сила разве силы Божиа, «вся бо, рече, елико восхоте, и сътвори на небеси, и на земли, и в мори, и въ всех безднахь»[292] и прочее.
Расмотряти ны есть лепо, возлюблении, и разу[ме]ти. Вижь бо, яко же се огнь о[т] камения исекаем и от древа исходяй, иже составляем есть и съгнещаемъ человечьскыми веществеными руками; егда же силу изгорениа приимет огнь, смотри, како ти человечьскыми хытростьми чистейшаа вещь, влагаема въ нь, очищается. Рекше, злато и сребро аще наполнено будеть каа любо скверны, рекше меса, ти влагаемо будеть къзньнивше огнь, и изжагается огненымь разгорением, и очищается въложное то злато и сребро, и отдавается вложившему е и чисто и без вреда, а вмешенаа та в не черность без вреда погибнет. Да ели то огнь вещественъ сый, иже Богомъ сотворен на службу умну и смыслену и словесну человеку...[293]
И вижь како ти силу пламене.[294]
Человекъ же, почтен Богомъ, вещью вещь очищает. Да аще мы убо, тварь суще Божиа, от него сотвореною тварию действуемъ, якоже хощем, то что ны есть, возлюблении, паче наипаче помышляти о Бозе, егоже совета и премудрости нашь умъ ни худе достигнути не можеть, не токмо же нашь умъ, но и ти святии ангели и архангели и вся чиноначалиа. То несть ли ему лепо действовати от него сътворе[но]ю тварию, якоже хощеть, управляти великоимениты свой корабль. Смотрению же его несть ны ся лепо супротивити, токмо славити и благодарити. Якоже прияхом законная и благодатьная Святых Писаний от общего владыкы, Господа нашего Исуса Христа, Спаса и правителя наших душь, от святыих и божественых его апостолъ по дару и благодати и силе Духа, да держимся убо, возлюбленнии, за ту предлежащую надеждю, не укланяющеся ни на шую, ни на десно, да не в самое то дно падемся пагубы впадемся, но ко церковнымъ истиннымъ и честнымъ святителемъ гря[ду]ще и тако доидемъ вышния светлости въ приходящемъ царствии Господа нашего Исуса Христа, емуже слава купно съ безначалнымъ Отцемъ и пресвятым и благымъ и животворящимъ Духом всегда и ныне и присно и въ векы векомъ. Аминъ.
