Едемь убо Иеросалимь сказается. Иерихон же — миръ, человекъ же исходяй — Адамъ, расбойници же — беси, прелщением бо техъ боготканныа одежда обнажися, раны же глаголет — грехи.
Что философью писах, не свемь! Христос реклъ святымь учеником и апостоломь: «Вамь есть дано ведати тайны царствиа, а прочим въ притчах».[277] То ли, любимиче, философьа, еюже славы ищу от человекъ?
Списающим евангелистом чюдеса Христова, хощу разумевати преводне и духовне. «Что мне дщерию Аира князя?»[278] — прашаю преводне, и речеть ми: «То и то есть». Что ми дщерию ханаоныня,[279] нъ хошу уведати духовне. Что ми кровоточивою,[280] но ищу силы слову! Что ми пятью хлебъ и двема рыбама,[281] прашаю евангелиста! Что ми о усшей смокви,[282] прашаю силы слову! Что ми старицею оною, въвергъшею две медници въ святилище![283] Но молюся, да темнаа ми душа будет вдовица и въвержет две медницы во святилище: плоть — целомудриемъ, душю же — смирением. Что ми о ловитве рыб,[284] но прашаю евангелиста! Что ми воднотрудоватым ицелевшим,[285] хотящю ведети и преводне! Си же вся божественаа Господа нашего Исуса Христа знамениа же и чюдотворениа, иже въ святемь Евангелии поминает, волею помянухь, иже святии и блажении отци наши подобнаа ко Господьскым словесем приложиша сказати и истолковати то и то зело полезно и добро и похвално.
То не толма чюдна и славна, елма же та сама истинна, иже Господь нашь делом, чюдо и знамение сотворивъ, показа, въскресив Аира князя дщер, мертву сущу оттинудь и издъхшу. Аще ли и ханаоныню помянем, и кровоточивую, и 5 хлеб, и две рыбе, и о усшей смокви или ону старицю, въвергшую две медници въ святилище, и о ловитве рыбъ, иже от Лукы и о воднотрудоватем ицелевшем, си бо вся поистинне тако суть была, якоже и евангелист сказаеть, еже Господь нашь не притчею, но делом божественаа своа знамениа и чюдеса показа.
Что ми самарянынею, яко аще свята есть, или 5-ю мужи ея или 6-мь, или кладязем Иаковлим и сынъми Ияковли и скоты их![286] Но речеть ми Ираклейскый епископь, авва,[287] того ли хощеши уведати: самаряныни есть душа, а 5-ть мужь ея — 5 чювьствъ, а шесты мужь ея — умъ, кладязь Ияковль — запинатель[288] по Иакове, сынове Иаковли — добрыа детели, скотии же — блазии помыслы.
То ли, брате, славы ища, пишу?! Повелику соблазнился еси! Ицеляеть Исус раслабленаго, имуща 30 и 8 лет, на Овчии купели, яже имать пять притворъ.[289] Что ли 30 и 8 лет? И речеть ми авва: купель — крещение есть, иде покупася овца Христос, 5 притворъ: 4 — детели, пятии — видении; 30 лет раслабленый — есть всякъ иже въ Троицю не веруеть; осмь же лет повесть ти Соломон, реклъ: «Да же часть седми, таче и осмому».
