но обаче не обременися прегрешении нашими, яко глаголют неции, ихже конець — сетнаа пагуба, но паче сам облегчи от бремен тяжькых хребетъ нашь. Богъ бо ревнивь сый, не дасть славы своея иному, укланяющаяся от него въ разньствие, поженеть съ творящими безаконие. Несть бо неправды у Бога, реку же, ни будет. Испытает сердца и утробы,
[269] яко Богъ есть праведень.
[270]Коли того увидети хощеши, почто груди взимают попове.[271]
Почто груди повелено възимати попомъ. Яко се уже Богу съведительствующю на отинудьное възвращение лукавыихь имъ деаний та сожегаема яве бяху на жертовнице: лой же есть, се Закона, си же даема беаху за грехи их, лой бо даем беаше за чревное ласкосердьство, исти же — си же за чресленыа сласти, селезена — яростнаго ради, на золчьнем бо месте лежит. Святителю бо даемо бяше во участие собе ему груди и рама. Груди убо ради — веденное, и истязаа Богъ святителя, рама же ради — деанное, да и деаненъ и ведененъ бысть святитель.[272]
Или яже въ Леугитьскых книгах о отрыгании ечь. Еда и то уведети тщеславие есть? Уча нас тех ради, како подобает быти чистымь. Надвое делящаго ради живота учить нас, да творим рассуждение благых деаний от супротивнаго. Жюющаго ради — яко да будемь боголюбиви. Якоже бо жюющии пищу отрыгають, тако подобаеть и нам день и нощь помышляти Божиа проповеди. Въдных же ради, имущих пера и чешюя, учи[т] ны: да якоже она суть горе вознесена, другаа же долняя вещи держится, тако подобаеть и нам со благыми деании и съ разумными совозвышатися, а не земными остаати. Птица же ради учить нас лихоимьства воздержатися, еже не во тме ходити; иже не во тме, но въ свете, се — еже в правде.[273]
Или на пятое лето от древа ясти плод,[274] а и то славитися? Но множества ради словес премину число словес и Вторый Законъ, и Судьи, и Руфь. Реку же и Еклисиаста, рекша: «Уже, треременноплете, не скоро ся преторгнет».[275] Не бо о ужи глаголет Соломон, но съветы удержаеть, всякъ бо советь и дума, аще утвердится, не подвижеться, и в чаание приходит. Того ради и ужем притчю Соломон сотвори.
Но о писании моем воспоминаю, иже къ князю твоему, к моему же напресну господину: «Понеже и пиавица оноа не устрегохся». Пиавицю убо глаголеть Писание и власть и славу, якоже не токмо египтяном, но и еросалимляном последует добро. А египтяне суть мирьстии, иеросалимляне же — мниси. Славы же и сласти не токмо мирьстии желають, но и мниси, еяже хотение комуждо нас последуеть и до гроба, аще бо и кто нас во глубоку старость доидеть, то и ту никакого же славолюбиа остатися не может. «Ибо и диктатору моему отнемогшу чювьствеными и вещественными расбойникы иерихонска прехода еже от Иеросалима». И диктаторъ — умъ сказается, тем же глаголет: «и убо уму моему отнемогшу»; чювьственыи же и безвещественыа расбойникы глаголет бесы; Ерихон же — миръ сказуется Се бо и въ Евангелии указает Господь нашь Исус Христос, глаголя: «Человекь схожааше от Иеросалима на Ерихонъ и в расбойники впаде и съвлекше и язвы возложиша на нь».
