Пришедшю блаженному Андрею, о немже нам слово, во божественую и великую церковь Владычицы и Богородици, Влахерна именуема,[67] и со учеником своимь Епифаниемь, видить преславное видение, видить бо теплую заступницю христианского рода въ церкви на воздусе стоящю и съ множеством вои аггельских чиновъ, и съ Предтечею же, и Богословцем, и со инеми многыми святыми, молящися, яко мати, со слезами Творцю своему и Богу, еже пощадети люди согрешившее и согрешающее, сице глаголющи: «Боже мой и Творче, и Сыну! Прости всякаа согрешениа христианьского рода, на тя Бога и Вседержителя уповающаго, и святое и великолепное имя твое призывающих, и мене, рабу твою и матере, любовию почитающим, и от них тебе ходатайствующу и молящуся». Тогда бо Владычица и Богородительница, яко дерзновение к нему стяжавши, бяше градъ и люди честнымь своимь омфоромъ покрывающи, показуа милостивное божественое же о человецехъ и свое еже о нас ходатайственое. Но понеже и сие божественое чюдо, и покровъ Пречистыа Богородица не утаися, но паче всемь явлено бысть, даждь до самого патриарха и царя,[68] темже пречистый многосветлый праздникъ Покрова Пречистыа составльше, уставиша праздновати месяца октября въ 1, яже творить церкви и до сего дни во славу и честь великому Господу Богу и Спасу нашему Исусу Христу и того Пречистой матери, ходатайци и молитвеници еже къ Богу.
Темже убо и намъ откуду, празднолюбци, светлый сей и преславный новейший празникъ Покрова Владычици и Спасителницы граду же и людемь многою любовию почитати и достойную честь, яко Царици и Владычици, воздаати, не яко она отъ насъ похвалъ и славы требующи, но паче да мы тою прославимся. Священници и царие и вся племена человечьскаа, богатии и нищии и вси людие, похвалу праздничную да воспоим, и да прославимь яко матерь Божию и нашю помощницу. Кождо благодарная да приносить: ово — смерение со благоговением, и инъ постъ и молитву да дарствуеть Владычици, и другый да простирает рукы к раздаянию нищим, и ово гневное брату да отпустить, и, тако творяще, Богородицю возвеличим. Такова бо приношениа празничнаа требуеть, а не в тимьпанех и гуслехь, и питиих, якоже еллиньстии отроци празнують, но в молитвахъ Богородителници пение, поновлению жизни нашей благодарная, яко длъгъ воздадимъ, благодати не тающе, но заступление исповедающе. Чистотою бо та и яко царьскою багряницею украшена, со царемь яко мати царствующи. «Честнейшиа херувимь и славнейшю серафим»
