СЛОВО ПОХВАЛНО ЧЕСТНОМУ ПОКРОВУ ПРЕСВЯТЫА ВЛАДЫЧИЦА НАШЕА БОГОРОДИЦА И ПРИСНОДЕВЕИ МАРИИ. ТВОРЕНИЕ СМИРЕНАГО ЕРМОНАХА ПАХОМИА
Понеже убо человеческий родъ обыче праздники святыхъ с похвалами праздновати, а иже святейшее всехъ честныи Царици праздникы Пречистыа Владычица нашея Богородица и Приснодевы Мариа попремногу с любовию почитати должны есмы и яко вышьшой святых и вышьшу похвалу приносити, яко Царици и Владычици, Царя и Владыку всем рождьшую. Но понеже мало время прииде, отнележе праздновахом честный празникъ Рожества Пречистыя Богоматере[56]: тогда бо рожеством ея праматерняя клятва[57] потребися, и Адамъ от вечныхъ узъ свободися,[58] и Богъ к намъ примерися; тогда бо Иаковля лествица утверждашеся.[59] Богу хотящю по ней къ человекомъ снити и человекомъ путь сотворити къ небеснымъ; тогда бо и пророци возрадовашася, своему пророчьствию сбытие зряще;[60] тогда бо и Давидъ,[61] видевь отъ него правнуку родившуюся,[62] бряцаа в гусли, играя духомь, глаголя: «Слыши, дщи, и виждь, приклони ухо твое»;[63] тогда бо не токмо пророци, но превышняа и земленаа вся тварь спразноваше. Ныне же прспе чьстнейший новейший Владычици и Богородици Покрова празникъ. Да уверятся вси и познають, яко не токмо, егда в мире с нами бяше, ходатайственое кь своему Творцю и Сыну милостивно предлагашеся, молитвеное и милостивное показоваше, но паче и по преславнем тоя преставлении, от земленыхъ въ небеснаа, но и той тогда не престает насъ посещающи, милостивное показующи.
Но понеже убо добро есть навыкнути, откуду и коеа ради вины сей пречестный Покрова праздникь уставиша святеи отцы в Костянтинеграде[64] праздновати. Елма убо в Костяньтинеграде, в немже спасенаа содевахуся, но понеже тамо, истинне умаляемей, грехъ множашеся, яко и при пророци: виде бо Давидъ во Израили истинну умаляему, помолися, глаголя: «Спаси мя, Господи, яко оскуде преподобный и яко умалишася истинный от сынов человечьскихъ».[65] Егда бо правда одолеваеть безаконию, тогда бо милосердие Божие к себе привлачим, а егда ли грехъ — тогда и негодование Божие. Якоже преже рехом: в Костяньтинеграде некаа стропотная содевахуся,[66] могуща негодование Божие навести. Но нигдеже не оставляеть Богородительница помощию, но непрестанно молится и молити не престает о человечьскомь роде. Якоже и дивный Андрей, иже мняйся человекомъ уродъ быти, но паче многых, иже въ премудрости мнящихся ветей, разумомъ превъсходити. Не во внешняа премудрости искаше, но паче горняа желаа и к темь подвизашеся, и уродством свое житие великое крыаше, якоже злато во глиннем сосуде, и сего ради ни славы требуя, ниже срама человечьскаго стыдяшеся славы ради оноа, яко да тамошняго срама, еже пред аггелы и человеки грешным бывающа, избегнеть. Сему убо блаженному Андрееви и со учеником своим Епифаниемь открыся сие божественое и пречюдное Пречистыа видение не во сне, ниже в гадании, но истинною и на яве, якоже явить ныне.
