Святейший же патриархъ приим чашу и прослезися в той часъ и сотвори молитву; и назнаменавъ крестом чашу и дунувъ на нее, и абие отступи пена и явися в чаши вино красное. Християне же на царскомъ дворе кричаше со слезами: «Владыко, помилуй родъ християнескъ!» И нача звати: «Господи, помилуй!» И испивъ чашу до дна, и показася ему вино слаткое, хорошое. И бысть цел и невреженъ. И рече патриархъ царю: «Вели ми мало воды дати». Царь же повеле ему дати воды. Лице же его просвятися, яко солнеце. Все же начаша дивитися о красоте лица его. И принесоша ему воду. И вольяша воду в кубокъ и пополоскавъ принес к жидовину и рече ему: «Яз от твоея от добрыя веры пил смертное зелие, а ты от моея от недобрыя веры испей воду». Жидовин же не хотяше пити. Патриархъ же рече: «Царю, дай ми судъ праведенъ со жидовиномъ. Мы от его руки пили зелие, что он за неделю делал. А яз пред тобою воду влил, а не зелие». А туто много народу стоящу, и все народи кликнуша на одного жидовина. И царь ему повеле пити. И испивъ воды тое мало, и абие нача тело его пухнути. Он же побеже ис полаты в домъ свой. Царь же посла за ним яныченина[123] видети, что над ним будетъ. И за полгодины прииде ко царю яныченин и сказа: «Царю, окоянный жидовин зле животъ свой испроверьже: и розсядеся утроба его и излияся». Царь же рече: «Старче, проси у мене что хощеши, а на меня гнева не дерьжи. Не яз тебе то зелие давал; хто тебе давал, тотъ и погибе». Патриархъ же рече: «Дай мне, царю, тех християнъ, которые во Египте живутъ, чтоб яз ихъ ведал и судилъ и приставы бы по них твои не ходили, чтобъ имъ продажи не было».
Царь же отдастъ ему крестиян и грамоту ему дал. Онъ же поиде от царя. Християне же понесоша его на рукахъ своих и прославиша Бога и сотвориша трапезу великую и честьну страннымъ и убогим. И турки же от того часа начаша чтити и боятися его вельми. Святейший же патъриархъ прииде в келию свою и испадоша ему зубы от лютаго того зелия, единъ по единому, без болезьни. Старецъ же ему по вся дни печаху пресноки,[124] махкой хлеб белой, темъ его корьмятъ. И после того злаго зелия во Египте бысть патриархомъ 16 летъ.
И прииде царь Сулиманъ турский ко Египту с войскомъ из Царяграда и взя Египетъ лета 7022-го[125] и того царя Гаврила взялъ и велелъ его обесити[126] в железныхъ воротех по конец большего торгу в царьскомъ платьи.
А слышахомъ о святемъ патриархе, что он на патриаршестьве 85 летъ, а постриженикъ онъ Синайского монастыря. А в монастыре был 12 летъ, а во Иерусалиме у Гроба Господня служил три лета.
