И что сего толкования яснейши, иже не о духовных каких царех сие толкует, но о чувственных, зане и малое время им быти тогда определенное сказует, рекше три месяца, а не более. Тако же и Ипполит святый яве на лице изводя сих реченных трех царей показует, глаголя: египетскаго, ливийскаго и ефиопскаго. Святый же Кирил Иерусалимский и время сих десяти царей сказует, глаголя: «Тогда востанут десять царей римских в разных градех, во едино время властьствующих» (знамение 9). Видиши ли, не рече царей иных языков, но глаголет царей римских, и не в разных временех, но во едино время властьствующих.
Сие святое писание внимательно смотрети подобает: убо глаголет овогда царей римских, овогда же египетскаго, ливийскаго и ефиопскаго. Вся бо суть истины исполнь: понеже глаголет, «яко немало царей мира сего к престолу его приведени будут, и поклонятся и предадутся ему». Ниже в толковании: «Ибо седмь царей в послушание свое антихрист к римскому престолу слугами своими в то время добровольно и без брани взыскати имать, а трех паки войною и силою с иными седмию цари достанет» (Книга Кирилова, знамение 9). Видиши ли, глаголет царей седмь, и в другом месте седмь, о тех же прежних глаголет, и паки три. Вси же сии хощут быти во время самаго того антихриста, при оном вконец римскаго царства разрушении и града Рима чувственном падении. А яко падение чувственное хощет быти, изъявляет сие Апокалипсис, чрез плач и рыдание царей земских, и купцев такожде: «Овии яко о сластех греховных, овии же яко никтоже тамо бремен их купует, мира и Ливана и корицы, и прочих всех. И глас гудец и мусикий не имать слышатися» (Апокалипсис, гл. 18). На сия святый Андрей чувственно толкование творит: «И чрез плач сущий о нем написуя (рече) великую напасть, иже приимет хвалящия первее о царствии и чести. Сей внезапу будет потреблен, да и след его не обрящется ктому, се бо являет (рече) гудец и мусикии, и прочих песней оскудение.
Отсюду явственно познавается не духовное токмо, но и чувственное Рима падение, сиречь разорение. Негли бо сего ради дважды рече, паде, паде. Паде жеубо отдавна духовным падением: чувственным же еще не бысть сие и доднесь, и свидетельствуют нынешния летописныя книги, яко российския, тако и иностранныя. И книга Мирописание, в нейже имеется описание всея вселенныя. Такоже и гражданския мартирологи, в нихже сказуется о российской и прочих землях описание жительства, веры же и обычая и разстояния их. В сих же книгах, как прежних, так и нынешних, явственно сказуется, яко град той Рим не опустошися, аще и в нечестии сый, обаче цел и невредим пребывает. Градом же тем Римом и около его странами в велицей власти, чести же и славе обладает и превзятельне владычествует папа, темже и страны оныя называются Владыкины. В защищение и хранение римскаго папина начальства имеют они государя австрийскаго, аще же и не в Риме он жительство имеет, обаче царь римский называется. И о всех сих зри в вышереченных книгах.
