Темже отсюда изъявляется, яко не у прииде Рим во опустение и начальство его в конечное разрушение, от времен убо Карула Великаго, даже до настоящих ныне лет, аще царей римских власть в Риме и престала, якоже речеся, самодержат же тую папы, обаче они суть, по вышереченному, антихристовы предотечи, и самому ему место уготовляюще. Егда же сам той приидет, тогда сию власть отдадят ему, по глаголющему о них сице: «Иже Божию и святительскую власть в Риме восхитив, и по всему миру разширяют и держат, и предадут оному последнему князю мира сего, еже есть антихристу» (Кирилова книга, знамение 9).
Или кто глаголет, яко аще антихрист доныне еще не царствует в Риме, но уготовляется ему место, то почто ему разоряти, иже самем делом ожидающаго его града? И паки: аще град той разорится и опустится, то како в пустом граде царем ему быти? Отвещает на сие Апокалипсис, сказуя о десяти царех, иже область свою отдати имут антихристу. И паки о тех сице рече: «Сии любодейцу (сиречь град той) возненавидят и запустевшу сотворят ю нагу, и плоть ея снедят, и сожгут ю огнем. Бог бо дал есть в сердца их сотворити волю Его… яко прилепишася греси ея даже до небесе, и помяну Бог неправды ея».
Прочее же где престолу антихристову быти, покажем ниже в 7-м знамении. Зде убо внимати подобает силе сего знамения, священным писанием изъясненнаго, от котораго явно зрится, яко не у прииде в мир антихрист, подобает бо в пришествии его до конца разрушену быти римскому начальству, и разорену самому тому граду Риму, по вышереченным. И еще присмотритися достоит по вышеписанным, иже Навуходоносором, царем ассирийским, виденное тело, у него же голени железни и часть некая скудельна: и на сие выше пространно сказано священным писанием, яко сии голени знаменуют царство Римское. А якоже телу оному голени две суть, тако и царство римское двочастно бысть: на востоце от Константина Великаго начало имущее в новом Риме, сиречь в Константинополе, и на западе в ветхом Риме. И сокрушенной убо сущей единей голени, сиречь монаршеству римскому, на востоце чрез турков, пребывает же еще другая голень на западе, и пребывати будет даже до пришествия антихристова.
Темже убо и от сего знамения уверитися можно, яко и ныне еще не прииде в мир самый той антихрист: ибо не прииде в конечное разорение и падение Рим и его начальство. Аще же его еже над вселенною властельство и разрушися и восточная часть отъяся, но его держава пребывает. Аще же уже и преклонися к падению, но обаче не отнюд падеся, имать бо и еще едину голень по обычаю стоящу, яже стояти будет до тех времен самого того антихриста, яко тако явствуется от всего вышеозначеннаго в главе сей божественнаго писания.
