И паки в Книге Кириловой во главе 4-й, знамении 9-м, пишет: «А вси тии слуги того ради творят, даже место своему властелю антихристу приготовят: того ради Христос в та последняя времена верным Своим явственно повеле блюстися. Ибо о всем о том назнаменовано явственными глаголы, иже и простейший человецы видяще и слышаще разсудити могут, яко антихристу предотечами его место самодержавное царское мира сего уготовано будет, и немало царей мира сего к престолу его приведени будут, и поклонятся и предадутся ему, понеже он, последний антихрист, не явится, дондеже первое, по пророчеству, к престолу своему слугами своими седмь царей прельстити и прилучити имать, и якоже повелит, они тако и начнут творити, с нимиже и других трех царей победит, и тако вскоре мало окаянный властьствовати будет». И ниже в той же главе и знамении толкует, глаголя: «Показует нам, како и коим обычаем последняго антихриста на оном престоле римском надеятися имут, якоже глаголет: тогда востанут в Риме десять царей, в разных местех будут, к римскому единонадесятому царству воедино в послушании будут. Тогда в Риме на том единонадесятом царе, иже есть последнем антихристе, скоро содеятися имать. Ибо седмь царей в послушание свое антихрист к римскому престолу слугами своими в то время добровольно и без брани взыскати имать, а трех паки войною и силою с иными седмию цари достанет».
Темже от сих писаний яве есть, яко не самообразное антихристово царствие в Риме бысть от лета 800-го, или от лета 884-го, но в его предотечах, приготовляющих место ему, сам же той не бысть в Риме или в мире от тогда, ниже ныне есть: но быти ему по сих назнаменуется, иже и триех великих царей убиет, а прочих седмь лестию под себе имать покорити.
Ныне же нецыи мудрствуют, якобы сии десять царей не чувственно приемлются в писании, но духовно, сиречь три сия – вера, любовь и надежда, седмь же – суть седмь таинств церковных. И се есть цари, ихже аки бы антихрист покори под себе от давных уже времен. Темже и римское царство разрушися и Рим падеся, аки бы токмо духовным падением, во время от восточныя Церкве отступления, то аки бы тогда и царем сим от антихриста бысть убиение и покорение. А инии умствуют паки не духовно, но чувственно сих царей, и утверждают то, аки бы сии цари прошли уже в прешедших разных временех, кииждо во свое время в разных землях бывши. Обаче таковое мудрование не достоверно быти является сих ради: понеже сказует божественное писание, яко сии цари при самом том антихристе малое некое время приимут, о нихже во Апокалипсисе Иоанну Богослову сказует ангел, глаголя: «И десять рогов (зверю), ихже видел еси, десять царей есть, иже не у царство прияша, но область, яко царие един час приимут со зверем. Толкование. Десять же рогов и Даниил виде предваряющих антихриста: из нихже три искореняяй, прочия покорит проклятый, един же час, или краткое лета глаголет, или един час годища, сиречь обращение солнечное, еже есть тремесячие, после емуже антихристови аки преимущему покорятся» (Апокалипсис толковый печатный, зач. 54).
