3. А будет служилых людей запасы везли люди их и крестьяне без них не на продажу, а с тех их людей и крестьян мытчики и перевозъщики и мостовщики возмут мыто и перевоз и мостовщину, и про то те их люди и крестьяне скажут, по государеву крестному целованью, и по тем люцким и крестьянским скаскам на мытчиках и на перевощиках и на мостовщикех мыто и перевоз и мостовщину по тому же взяти втрое, и отдать тем людем, у кого взято. А будет кто в челобитье в своем прибавит, что его на перевозе или на мыту лаяли и били и грабили, и того искати судом, и в тех делах указ учинити по суду и по сыску.
4. А будет которые московских чинов всякие люди, и городовые дворяне, и дети боярские, и иноземцы по мытом и по перевозом и по мостом учнут с собою провозить торговых всяких чинов людей с товары, а про то сыщетца, и тех людей бить кнутом, да на них же взяти мыт и мостовщину и перевоз втрое, и отдать мытовщиком и перевозъщиком и мостовщиком.
5. А которые торговые всяких чинов люди по перевозом и по мытом учнут пролыгатца имяны служилых людей, а про то сыщетца, и тем людем по тому же чинити наказание, бити кнутом и имати на государя пени по пяти рублев с человека. А имати пеню с таких людей на Москве и в городех, где на них о том будет челобитье.
6. А в головах и в целовалникех в таможнях и на кабакех и на мытах и на перевозах и на мостах, которые таможни и кабаки и мыты и перевозы и мосты в городех, и в уездех, в государевых дворцовых селех и в черных волостях, опричь посадских людей и дворцовых сел крестьян, ничьим людем и крестьяном не быти.
7. Тако же и в зимнее время на реках от берегов и около мостов для мостовщины в городех и в государевых дворцовых селех и в черных волостях и в патриарших и в митрополичьих и в архиепископлих и епископлих и в монастырьских вотчинах и в боярских и околничих и думных людей и столников и стряпчих и дворян московских и дияков и жилцов и городовых дворян и детей боярских и дворовых людей в вотчинах и в поместьях льду не окалывати, и служилым и торговым и всяких чинов людем тем убытков не делати. А кто для своей корысти учнет мосты окалывати, а про то сыщется, и тем чинити наказание, бити кнутом, и пеню имати, что государь укажет.
8. Да и постоялово в дорогах, в селех и в деревнях, с служилых людей не имати, и о том на Москве учинити заказ крепкой, и биричем велеть кликати по многие дни, и в городы послати государевы грамоты, и велеть в городех о том по тому же учинити заказ крепкой, чтобы с служилых людей однолично нигде никто постоялово не имал.
