Приехавъше же сказаша Мьстиславу Юрьиги же все сказа. И рекшимъ молодым князем: „Мьстиславе и другий Мьстиславе, не стоита. Поидемь противу имъ“. Переидоша же вси князи Мьстиславъ и другий Мьстиславь Черниговьскый реку Днепр, инии князи предоша и поидоша в поле половецкое. Переидоша же Днепр во день во вторник, и усретоша татареве полкы рускыя. Стрелци же рускыи победита и, и гнаша в поле далеце секуще, и взяша скоты ихъ, а со стады утекоша, яко всимъ воемъ наполнитися скота.
Оттуду же идоша 8 дни до реки Калкы. Стретоша и сторожьеве татарьскыи. Сторожемъ же бившимъся с ними, и убьенъ бысть Иванъ Дмитреевичь, иная два с нимъ.
Татаром же отъехавшим, на прочьне реце Кальке, устретоша и тотарове половецкыя полкы рускыя. Мьстиславъ же Мьстиславличь повеле вперед перейти реку Калку Данилови сполкы, инемъ полкомъ с нимъ, а сам по нем нереиде, еха же сам во стороже. Видившу же ему полкы татарьскыя, приехав рече: „Воружитеся!“ Мьстиславу же и другому Мьстиславу, седящема во стану не ведущема, Мьстиславъ же не повела има зависти ради, бе бо котора велика межю има.
Съразившимся полкомъ на место. Данилъ же выеха на перед, и Семьюнъ Олюевичь и Василко Гавриловичь поткоша в полкы Тотарьскыя, Василкови же сбодену быв-шю. А самому Данилу бодену бывшю в перси, младъства ради и буести не чюяше ранъ бывших на телеси его. Бе бо возрастом 18 летъ, бе бо силенъ.
Данилови же крепко борющися, избивающи тотары. Видивъ то Мьстиславъ Немый, мневъ, яко Данилъ сбоденъ бысть, потче и сам в не, бе бо мужь и тъ крепок, понеже ужика сый Роману от племени Володимеря, прирокомъ Маномаха. Бе бо велику любовь имея ко отцю его: ему же поручивше по смерти свою волость, да я князю Данилови.
Татаром же бегающим, Данилови же избивающи ихъ своим полкомъ, и Олгови Курьскому крепко бившимся инемъ полкомъ сразившимся с ними. Грех ради нашихъ, рускимъ полкомъ побежёнымъ бывшимъ.
Данилъ видивъ, яко крепцейши брань належить в ратных, стрельцемъ ихъ стреляющим крепце, обрати конь свой на бегъ, устремления ради противныхъ. Бежащю же ему и вжада воды, пив почюти рану на телеси своем, во брани не позна ея, крепости ради мужьства возраста своего. Бе бо дерзъ и храборъ, от главы и до ногу его, не бе на немь порока.
Бысть победа на вси князи рускыя. Тако же не бывало никогда же. Татаром же победившим русьскыя князя за прегрешение крестьяньское, пришедшим и дошедшим до Новагорода Святополчьского. Не ведающим же руси льсти ихъ, исходяху противу имъ со кресты, они же избиша ихъ всих.
