Бяшет ту лествица от древа купариса прилождена чрез змея, а написано бо бяше на ней 3 слова: греческы, обезскы, рускы. 1-е слово греческы: «Котораго человека Богъ принесеть к лествице сей...» 2-е слово обезскы: «Да лезеть чрес змея без боязни...» Третьее слово рускыи: «Да идеть с лествице чресъ полаты до часовнице». Бяшеть бо лествиця та 18 степеней: така бяшеть толстота змея того. Взидоша горе, оже тамо — другая лествиця внутрь, написано тако же.
И преидоша чрес полаты, бяху бо полаты полны гада, но не створиша им ничто же.
Они же пришедше и влезоша в церковъ, и наполнишася благоухания уста их: бяху бо много деяния въ церкви написана. И поклонишася гробомъ святыхъ 3-хъ отрокъ Онаньи, Озарьи и Мисаила и ркоша: «Приидохомъ к вам по Божию изволению и великаго царя Василия богохранимаго просить от вас зднамения». И стояше клубокъ на гробе Онаньине златъ с камениемъ драгымъ с жемцюгом украшеным, полнъ мура и ливанъ, и стекляницю, того не видихом. Мы же,[58] вземше ис кубка того, быхомъ веселе. И воставше от сна, мыслихомъ взяти кубокъ с виномъ и нести ко царю. И бысть нам глас от гроба въ 9-й час дни: «Не возмете зднамения зде, но идите в царевъ домъ, возмите зднамение!» Они же ужасны быша велми. И бысть имъ глас 2-е: «Не ужасайте, идите!»
Они же вставше идоша. Бяше бо царева полата от часовнице. И внидоша в цареву полату и видиша ту одръ стоящъ, и ту лежаше 2 венця: царя Навходоносора[59] и царице его. Они же вземше, видиша грамоту, написано греческымъ языком: «Си венци створене бысть, егда Навходоносоръ царь створи тело златое и постави на поле Дирелмсгьй».[60] Бяху бо венци те от камени самфира, измарагды и жемчюга великаго и злата аравита. «Си венци сокровены бысть доселе, а ныни положена бысть и на царе богохранимом Василии и цареце блаженнии Александре[61] молитвами святых 3 отрок».
И вшедъ въ 2-ю полату и видеша запоны и памфиры царьскыя, иде же прияша руками, и бысть все, акы прах. И бяхут ту ларцы со златомъ и сребром, и отвергше, видиша злато и сребро и камение многоценное и драгое. И взяша камень великых числомъ 20 донести цареви, а собе, яко могут отнести, и взяше кубокъ таковъ же, яко же у трех отроков.
И приидоша къ церкви и вшедше поклонишася трем отрокомъ, и не бысть им глас. И начаша тужити, и вземше от кубка того, испивше и быхомъ весели. И бысть им глас заутра свитающи дни неделному и рекошач имъ: «Умыемъ лице свое!» И узревше кубокъ церковный с водою, и умывше лица своя, и воздаша хвалу Богу и трем отрокомъ. Отпевше и заутренюю и часы, и бысть имъ глас яко: «Взясте зднамение, поидите путемъ своим, Богомъ водими, къ царю Василию». Они же, поклонишася, испивше по 3 стеклянице и поидоша къ змии. И прислонивше лествицю, полезоша чрес змея, и принесоша все, еже имеяху.
