И оттоле идохом къ святому Констянтину, в монастырь женски; ту лежит тело святаго Климента архиепископа, ту же тело и Феофаны царица. И оттоле идохом къ святому Ивану Дамаскыну[33] в монастырь женьскы. А оттоле идохом къ святому Ивану Предтечи, иже нарицается Продром, зовуть Ивана «Богомъ богаты». Та же церковь велми удивлена, и ту целовахом руку святаго Иоанна Ктитора, иже устрои церковь, окована златом и с драгим камениемъ и женчюгом; а не Предтечева рука — а Предтечева, иже впреди писахом, у Прекрасной Богородицы близ Студискаго монастыря: ту рука святаго Иоанна правая, а левая на Иердане.
И оттоле идохом в Лахерну, в церковь святыя Богородица идеже лежить риза и поясъ и скуфия, иже бе на главе ея была. А лежит въ олтари на престоле, в ковчезе запечятано тако же, яко же и Страсти Господни, еще и твержи того: приковано железом, ковчег же сътворенъ от камени хитро велми. И целовахомъ. Ту лежит святы Патапей и святая Анастасия и святаго Пантелеймона мощи, целовахом. И оттоле идохом къ церкви святаго Николы, ту лежит глава святаго Григориа и святаго Леонтия.
И оттоле идохом вне града. На поле, близ моря, монастырь великъ въ имя святых Козмы и Дамиана, ту целовахом главы ею, окованы хитро велми златом. А оттоле възвратихомся и въ град и идохом къ святой Феодосии девици и целовахом ю, ту есть монастырь женскы въ имя ея, при мори. Есть же чюдно велми: въ всякую среду и пяток, аки праздникъ, множьство мужей и женъ подавают свеща и масло и милостыню. Ту же множество людей лежить болных на одрех, различными недуги одръжими, приимають исцелениа и входять въ церковь, а ины вносят и ложатся пред нею по единому человеку, а она въступает, идеже кого болит, и здравие приимают. А певци поють от утра до 9-го часа, таже литургию поють поздно.
И оттоле идохом сквозе град, — далече поприще велико итти къ святому Кипреану, — и целовахом тело его: великъ былъ теломъ. Ту близ монастырь женски, и ту глава святаго Пантелеймона, ту же и кровь его. А оттоле идохом в монастырь святаго Стефана, ту лежит глава его. А оттоле идохом къ святей Варваре, и глава ея ту.
А въ Царьград, аки в дубраву велику внити: без добра вожа невозможно ходити, скупо или убого не можеши видети ни целовати ни единого святого, разве на праздники которого святого будеть, то же видети и целовати.
Оттоле поидохом къ Иерусалиму.
