И оттуду, идучи к монастырю Инеяклесиа, рекше къ 9-и чиномъ церкви и въ одиной церкви ту Христос велми гораздо, аки живъ человекъ, образно стоить, не на иконе, но собою стоить. Ту же дворъ, нарицается «Полата правовернаго царя Констянтина»: стены его высоки велми, выше городных стен, великъ, граду подобенъ, под подрумием стоит, при мори. Ту близ монастырь Сергиа и Вакха, и целовахом главы ею. То все посолнь водится, подръживая по левую руку городную стену, възле море.
От подрумия поити мимо Кандоскамии,[23] туто суть врата городная железна решедчата, велика велми; теми бо враты море введено внутрь города. И коли бываетъ рать с моря, и ту держат корабли и катарги, до треюсотъ. Имеет же катарга веслъ 200, а иная 300 весел, в тех судех по морю рать ходить. А оже будет ветръ, а они бежат и гонят, а корабль стоит — погодия ждеть.
А оттоле идохом къ святому Димитрию, ту лежит тело святаго царя Ласкариасафа, тако бо бе имя его, и целовахомъ, грешнии, тело его. Той есть монастырь царевъ, стоить при мори, и ту есть близ монастыря того живет жидовъ много при мори, възле городную стену, и врата на море зовутся Жидовская. И ту было знамение: приходилъ Хозрой,[24] царь перскы, ратию къ Царюграду, и уже хотяше взяти град, и бысть въ Цариграде плачъ великъ. Тогда прояви Богъ старцу некоему и рече: «Вземше поясъ святыя Богородица, и омочите конець его в море». И сътвориша тако с пениемъ и плачем, и възмутися море и разби корабля их о градную стену. Тоже и ныне кости их белеются, аки снегь, при градной стене, близ Жидовскых вратъ.
Таже идохом ко святому Иоанну, въ Студискы монастырь, много бо суть ту видениа — не възможно писати — и целовахом тело святаго Савы повара: 40 лет варилъ на братию ясти. А другое — тело святыя Соломаниды. И ту стоит лотокъ, на нем же вообразися святая Богородица съ Христомъ: проскурникъ всыпа муку на доску и възлия воду, и въскрича отрочя в муце на доске. И проскурник, ужасеся, тече къ игумену и братии. И прииде игумен и братия и видеша на досце образ святыя Богородица съ младенцем съ Христомъ. Церковь же та велика велми и высока, полатою сведена, иконы в ней, аки солнце сиають, велми украшены златом, а дно церковное — много дивитися: аки женчюгом иссажена, и писцу тако не мощно исписати. Тако же и трапеза, идеже братия ядять. Велми чюдно, паче инех монастырей, стоит на краи, близ Златых вратъ. Ту жилъ Феодоръ Студискы[25] и в Русь послал многы книги: Устав, триоди и ины книгы.
