и възрадовахомся велми, зане бо без слезъ не мощно приити къ Страстем Господнимъ. И ту виде нас царевъ боляринъ, ему же имя протостратарь,
[10] и допровади ны до Страстей Господних, Бога ради, и целовахомъ, грешнии. По той же стороне, поступивше мало, ту на стене Спасъ, мусеею утворенъ, и вода святая от язвъ гвоздинных от ногу его идет, и ту целовахом; и помазаша ны масломъ и
напои водою святою. И ту стоятъ столпове от камени краснаго мрамора, оковани чюдно, в них же лежать мощи святых.
[11] Ту люди прикасаются, идеже кого болить, здравие приемлют. И ту виде нас святый патриархъ Царяграда, ему же имя — Исидоръ,
[12] и целовахом в руку его, понеже бо велми любить Русь. О великое чюдо смирениа святых! Не наш обычай имеютъ.
Оттоле идохомъ къ святому Арсению патриарху и целовахом тело его, и помаза ны старець маслом его. И то все идет посолнь въ церкви той.
И оттоле пошедше въ двери из церкви, итти промеж стенъ со свещею, обходя акы кругомъ.
Тамо же стоить икона святы Спасъ велми чюдна, и то зовется Елеоня гора,[13] по подобию, якоже и въ Иерусалиме. Оттоле, пошед къ олтарю, стоятъ столпи велми красны, подобни аспиду; ту же есть в великомъ олтаре колодяз, от святаго Иердана явися. Стражи бо церковнии выняша изь кладязя пахирь, и познаша каликы рускыя, Греци же не яша веры, русь же реша: «Нашь пахирь есть, — мы купахомся и изронихом на Иердане, а во дне его злато запечатано». И разбивше ставець и обретоша злато, и много дивишася, се бо чюдо сътворися Божиим повелениемъ, то ся нарече «Иерданъ».
И вышедше из великого олтаря на левую руку посолнь — и ту кандило велико с маслом сткляно падеся от высоты и не разбися, ни огнь не угасе. Аще бы железно было, то да бы ся разбило, но некая сила невидимая поставила на камени. И ту близ трапеза каменна святого Авраама, ему же Богъ въ Троици явися под дубом Амаврийскым; той дубъ зелено лествие имеет и зиме и лете, и до скончяниа веку, огороженъ каменем высоко, сороцина стрегуть его. Ту же одръ лежить железенъ, на нем же святых мученикъ мучиша, поставивше на огне. У того одра множество люди приходитъ и приемлють исцеление, и целовахом его. И ту стоятъ стлъпове от камени багряна, красни велми, пропестри, аспиду подобни; видети в них человеку лица своего образ, аки в зерцало; от великого Рима привезени суть.
Имать же святый Софеи множьство кладязъ съ сладкими водами, оприч тех, иже въ стенах церковных и промежу стенъ, и не познати их равно со дном, рекше, помостом церковным. Суть же колца железны вбиваны въ мраморъ, мрамор бо зовется камень гладокъ и красенъ вельми. Тако же и кандилъ множество неисчетно въ святой Софии: иная же въ пределех и в комарах, а инии въ стенах и промежи стенъ и во улицах церковных, идеже иконы великыя стоят, и ту кандила с маслом древяным горят. И ту, грешнии, приходихом съ слезами и радостию, по силе свещи подавахом, тако же и у мощей святых. Святы Софеи имат дверей 365, тако же и престолов, окованы хитро велми. Инии же от них загражени за оскудение.
