ОТ СТРАННИКА СТЕФАНОВА НОВОГОРОДЦА
Азъ, грешный Стефанъ из Великаго Новагорода, съ своими другы осмью приидох въ Царьградъ[6] поклонитися святым местом и целовати телеса святых. И помилова ны Богъ святыи Софеи Премудрость Божия. В неделю Страстную приидохом въ град, и идохомъ къ святей Софеи.[7]
Ту стоить столпъ чюденъ[8] вельми толстотою и высотою и красотою, издалеча с моря видети его. И на верху его седить Иустинианъ Великы на коне велми чюденъ: аки живъ, в доспесе сороцинском, грозно видети его, а в руце яблоко злато велико, а вь яблоце крестъ, а правую руку от себе простеръ буйно на полъдни на Сороциньскую землю, къ Иерусалиму. Суть же инии стлъпове мнози по граду стоятъ от камени мрамора, много на них писаниа от връха и до долу писано рытию великою. Много дивитися и умъ не можеть сказати: железо камени того не иметь.
А от того столпа Устинианова внити въ двери святыя Софии в первыя двери, поступивъ мало — въ другия, и 3-е, и 4-е, и 5-е, и в шестые, тож в седмые двери внити въ святую Софею, великую церковь. И, пошед мало, обратитися на западъ и възрети горе на двери: ту стоит икона святы Спасъ. О той иконе речь в книгах пишется, того мы не можем исписати. Ту бо поганы иконоборец лествицю пристави, въсъхоте съдрати венець златый, и святая Феодосиа опроверже лествицю и расзби поганина, и ту святую заклаша рогом козьим.
И оттоле мало пошед, видехомъ множьство народа, целующе Страсти Господни,
