Речеши ми: «Славишися, пиша, философ ся творя», а первие сам ся обличаеши: егда к тобе что писах, нъ ни писах, ни писати имам. А речеши ми: «Философьею пишеши», а то велми криво пишеши, а да оставль аз почитаемаа Писаниа, аз писах от Омира, и от Аристотеля, и от Платона, иже во елиньскых нырех славне беша. Аще и писах, но не к тебе, но ко князю, и к тому же не скоро. А еже сожалил еси, оже тя есмь вменилъ, а Богъ сведетель, яко не искушаа твоего благоумиа, но яко просто писавь. Да аще того не моглъ еси разумети, то всуе приводиши на мя учителя своего Григоря.[236] Речеши бо: «У Григоря беседовал есмь о спасении душевнемь». Да еда коли порекох ли укорих Григоря? Но еще исповедаю, яко не токмо праведенъ, но и преподобень, нъ аще дерзо рещи, святъ есть. Но обаче того аще не училъ тя, то не веде, откуду хощеши поручившаяся тебе душа руководити, Григорю бо и тебе того не ведати.
Но чюдо речеши мне: «Славишися!» Да скажю ти сущих славы хотящих, иже прилагают домъ к дому, и села к селомъ, изгои же и сябры, и бърти, и пожни, ляда же, и старины, от нихже окааный Климъ зело свободен. Нъ за домы, и села, и борти, и пожни, сябръ же и изгои — землю 4 лакти, идеже гроб копати, емуже гробу самовидци мнози. Да аще гроб свой вижю по вся дни седмь краты, не вемъ откуду славити ми ся. Не бо ми, рече, мощно иного пути имети до церкви, кроме гроба. Аще похотелъ бых славы, по велику Златоязычнику, то не чюдо, мнози бо богатство презреша, славы же — ни единъ, а первое искалъ бых власти по своей силе. Но съведый сердца и обистья тъ единъ съвесть, но елико молихся, да бых избавился власти. Паки ли по его смотрению а случить ми ся — супротивити ми ся ему несть лепо.
Отселе, любимиче, ответа да не сотворяю ти, но на въпрос твое благоумие понужаю. Несть ли лепо пытати потонку Божественых Писаний? Торчиве блаженному Соломону, рекущу въ Притчах: «Аще утвердиши к нему око свое, никакоже сравнить ти ся».[237] Уже и Соломон, славы ища тако пишет? Или: «Премудрость созда себе храм и утверди седмь столпов».[238] А то, славы же ли ища, пишет? Се бо глаголеть Соломон «премудрость созда себе храм»: премудрость есть Божество, а храм — человечьство, аки во храм бо вселися въ плоть, юже приять от пречистыа владычица нашеа Богородица истинный нашъ Христос Богъ. А еже «утвердивъ 7 столпов» — сиреч 7 соборов святых и богоносных наших отець.[239]
Что же пакы сего Соломона родивый: «яко благоволиша раби твои камение и персть его ущедрят».
