а не опресноком.
[223] О том пророкъ глаголеть: «Ты еси иерей в векы по чину Мелхиседекову».
[224] И есть пещерка та вдале от Преображениа, яко дострелить добре, и есть къ западу лиць место то святое.
И ту почьстиша ны добре в манастыри том у святого Преображенья, и ту обедахом. И опочивше добре, и вставше, идохомъ въ церковь святаго Преображения, и поклонихомся на месте святемь, идеже преобразися Христос Богъ нашь, и облобызавше место то святое с любовию и радостию великою, и вземше благословение от игумена и от всее братии, изидохом из манастыря того святого, и обиходивше вся места святаа по всей горе той святей. Туда бо путь есть мимо пещеру ту Мелхиседекову к Назарефу. Назарефъ есть на запад лиць от Фавора. И второе паки любовию влезохом в пещеру ту святую и поклонихомся святей той трапезе, юже создалъ Мелхиседекъ со Авраамом. И есть до дняшняго дне трапеза та в пещере той. И ныне приходить ту святый Мелхиседекъ часто и литургисает в пещере той святей, и почивают вси вернии, иже ту живут, в горе той святе. Ти же ми поведаша о том поистине. И похвалихом Бога, сподоблешаго нас, худых и недостойных, видети та святаа места и облобызати устнами недостойными.
И прочее снидохомъ с горы Фаворски долвь на поля и идохом по полю две версте к Назарефу на запад лиць. И есть от Фарския горы до Назарефа 15 верстъ великых; по полю две версте, а 3 в горах; путь тяжекъ велми и тесенъ, зело непроходен: туды бо погании срацини мнози седят в горах техъ, и по полю тому села суть многа срациньскаа, и ти биють, выходяще из селъ тех, в горе той страшной. И бедно ми ити в мале путем темъ. Но ли со многою дружиною, то тако может проити путем темъ бе-страха; нам же не пригодишася дружина, но сами едини тако, толко 8 нас, и то же худа и безъ оружия, на Бога надеющеся, проидохом. Божиею благодетию храними и молитвами святыми Владычица нашея Богородица сблюдаеми, бес пакости по здраву доидодхом святаго града Назрефа, идеже бысть святое благовещение святей госпожи Богородици от аггела Гавриила.[225] Ту же и Христос въскормлен бысть.
О ГРАДЕ НАЗАРЕФЕ
Назарефь же градок малъ есть в горах на удолне месте, да оли надшед над онь то же узрети. И посреде градка того церкви создана велика вверхъ о трех олтарех. И, влезучи в церковъ ту, на левей руце есть яко пещерка мала глубока пред малым олтарцем. Имать же двери малы двои пещера та: едины дверци от запада, а другии дверци къ встоку лиць. Слести по степенемъ въ пещеру ту и во обоих дверцих тех. Влезучи в пещеру ту западными дверми, на правой руце есть келия создана, дверци малы имущи; и в той келийци жила святаа Богородица со Христомь, ту въскормленъ бысть Христос, в святой той храминци; и ту ложица его, идеже лежал Исус, ту в келийци той. Ложицею тако низко на земли создано.
