О ВИВСАИДЕ ГРАДА
А оттуда есть близь в горе Вифсаида градок Андреев и Петров. И ту есть место, идеже приведе Нафанаила к Петрови и къ Андрею.[215]
ИДЕЖЕ ХРИСТОС ПРИДЕ КО УЧЕНИКОМ, ЛОВЯЩИМ ИМЪ РЫБ
И ту есть место на мори, идеже прииде Христос к Зеведееви и къ Андрееви и к Петрови, они же влечаху мрежа и завязывяху. И ту познаста Христа Андрей и Петръ, и ту остависта лодию и мрежа, идоста вслед Христа.[216] И ту селъ был близь моря Зеведеева отца Иоаннова, и ту есть был домъ Богословца Иоанна. И ту Христосъ изгна человека легион бесов, и повеле им влести въ свиния, и ту истопаша свиниа в мори.[217] И ту есть близь село Капернаумъ.
А оттуда есть близь река велика, и та река поиде изъ езера Генисаритьскаго, и входить река та в море Тивириадьское. Езеро же Генесаритское велико вельми, 40 верстъ вшире, всямокачно кругло, рыбы в немъ множество есть. И ту есть близь езера того град, имя ему Генисира; да потому ся тако зовет Генисаритьское.
О ГРАДЕ ДЕКАПОЛИИ
И ту есть другий град велик зело, имя ему Декаполий. И ту есть место равно близь езера того, и на том месте Исус стояше, уча народы, пришедша от Декаполя и помория Тирьскаго и Сидоньскаго, о томъ бо месте въ Еуангелии глаголет. И ина многа чюдеса створи Исус около езера того.
О ГОРЕ ЛИВАНСТЕЙ
И ту есть об онъ пол езера того, на летний встокъ лиць, гора высока велми и велика зело, и снези на ней лежат чрес лето; имя горе той Ливан. На той горе ражается ливанъ и темианъ былый.[218] И с тоя бо горы Ливаньскыя идета 12 реце велице; и идетъ 6 рекь къ встоку лиць, а 6 рекъ на угъ лиць. И входят рекы ты въ езеро Генисаритьское. А 6 рекь идут к Велицей Антиохии. Да то ся место зоветь Месопотамия, еже есть Сердоречие. И ту есть межю теми реками Харъранъ, отнюдуже изиде Авраамъ.[219] От тех рекъ наполняется езеро Генисаритьское вод многъ. А ис того езера идеть река велика в море Тивириадьское, и умножаеться вода тою водою в мори Тивириадьстемь. А из моря того идеть Иордан. Якоже и преже сказахъ о Иордане, то тако постине есть.
Горы же тоя Ливаньския не могох дойти ногами своими страха ради поганых, но сказаша ны добре о горе той иже водяху ны християне, живущии тамо; и не даша ны тамо ити к горе той Ливаньстей, много бо поганых ту живут в горе той. Но токмо очима своима видели есмы гору ту и та места около езера того Генисаритьскаго. И есть же близь езера того от Тивириадьскаго моря, яко двою версту межи вдалее, есть на летний встокъ лиць отъ Тивириады езеро Генисаритьское.
