И ту другое место, идеже възложиша венець трьновъ на главу Господню и в багряницу поругания облекоша.
[69]О ЖЕРТВЕНИЦЕ АВРАМОВЕ
И ту есть близ жрьтвенник Авраамовъ, идеже положи жрьтву Богови Авраамъ и закла овенъ въ Исаака место.[70] На то же бо место възведен бысть Исаакъ, идеже Христосъ възведен бысть на жертву и закланъ бысть нас ради грешных.[71] А оттоле есть близь место, яко двою сажень далее, идеже заушен бысть Христос Богъ нашь. А оттоле есть далее 10 сажень святая Темница, идеже всаженъ бысть Христос, и ту посидел мало, дондеже приспеють июдеи и поставять крестъ, да распнуть и. И та святаа места вся под одиным покровом суть, по ряду вся к полунощию лиць. А отъ Темници Христовы до места, идеже святаа Елена налезла честный крестъ, гвоздия, и венець, и копие, и губу, и трость, есть сажень 20 и 5. Есть же Гроб Господень, и Распятие, и та святаа места вся на удолнемъ месте суть; и есть вгорие от запад лиць над Гробом и над Распятием.
И ту есть место на пригории; на то место притече скоро святая Богородица. Тщаше бо ся, текущи вслед Христа, и глаголаше, в болезни сердца своего слезящи: «Камо идеши, чадо мое? Что ради течение се скорое твориши? Еда другий бракъ в Кана Галилеи,[72] да тамо тщишися, сыну и Боже мой? Не молча отъиди мене, рожшаа тя, дажь ми слово, рабе своей».[73] И пришедше на место то святаа Богородица, и узре с горы тоя сына своего распинаема на кресте, и видевши, ужасеся, и согнуся, и седе, печалию и рыданиемъ одръжима беаше. И зде събысться пророчество Симеоне, яко прежь рече святей Богородици: «И се лежит на встание и на падение многим въ Израили, и тебе же самой оружие душу проидет, егда же узриши сына своего закалаема».[74] Ту же стояху мнози на месте том, друзи и знаниа его, издалеча зряще. Мария Магдалыни и Мария Ияковля и Саломии,— идеже стояху вси, иже от Галилея пришедше и съ Ианном и съ материю Исусовою. Стояху же вси знаемии друзи Исусови, зряще издалеча, якоже пророкъ глаголеть о том: «Друзи же мои и ближники моя издалеча мене сташа».[75] И то место есть подаль от Распятия Христова, яко полутораста сажень есть на запад лиць место то от Распятия Христова. Имя месту тому Спудий,[76] иже ся протолкуеть Тщание Богородично. И есть на месте томъ ныне манастырь, церкви Святаа Богородица клетьски верхъ въсперенъ.
О СТОЛПЕ ДАВЫДОВЕ
А оттуда есть до столпа Давыдова и до дому 200 сажень. Столпъ же то есть святаго пророка Давыда; ту есть и дом его был. В том столпе Давыд пророкъ и Псалтырю сставил и написал. Дивен есть столпъ тъ, великим камениемъ сделан высоко вельми, на 4 углы созданъ, и весь есть черствъ и днероден; и камень уродился. Посреде его воды в немъ многи. Двери же имать 5-ры железны и степеней имать 200, по нима же взити горе. И жита в нем бес числа лежитъ. И есть много твердъ ко взятию, и то есть глава всему граду тому; и блюдуть его велми и не дадять влести никомуже во нь лапь. Мне же, худому, недостойному, пригоди Богъ в столп-от святый, одва могох ввести с собою единого Издеслава.
