Есть пещерка та святаа оделана около красным мрамором, яко именъ, и столпьци около мрамором красным стоят числом 12. Верху же над пещеркою сделанъ яко теремець красенъ на столпех, верху круголъ и сребреными чешюями позлащеными покован; и на връхъ того теремца стоит Христос, сделанъ сребром яко в мужа более, и то суть фрязи сделали, и ныне есть под самым врьхом темъ непокрытымъ. Суть двери 3-и у теремца того учинени хитро, яко и решето крестьци; и теми дверми влазят люде къ Гробу Господню. Да то есть Гробъ Господень был пещерка та, якоже то сказах: испытах добре от сущих ту издавъна и ведущих поистинне вся та святаа места.
Есть же церковь та Въскресение образомъ кругла, всямокачна: и в дле и въ преки имать же сажень 30. Суть же в ней полати пространьны, и тамо горе живет патриархъ. И есть же отъ дверей Гробных до стены великого олтаря саженъ 12. Ту есть внъ стены за олтаремъ Пупъ земли,[64] и создана над нимъ комарка, и горе написан Христос мусию, и глаголеть грамота: «Се пядию моею измерих небо и землю».
О МЕСТЕ СРЕДИ ЗЕМЛЯ, ИДЕЖЕ РАСПЯТЬСЯ ХРИСТОС
А отъ Пупа земнаго до Распятия Господня[65] и до Края[66] есть саженъ 12. Есть же Распятие Господне къ встоку лиць, есть же на камени, высоко было, яко стружия выше. Камень же тый был круголъ, яко горка мала. А посреди камени того, на самом врьху, высечена есть скважня лакти воглубле, а вшире мний пяди кругъ; и ту был въдруженъ крестъ Господень. Исподи же под темъ каменемь лежить прьвозданаго Адама глава.[67] И в распятие Господне, егда на кресте Господь нашь Исус Христос предасть духъ свой, и тогда раздрася церковная катапетазма, и камение распадеся; тогда же и тъ камень проседеся над главою Адамлею, и тою разселиною сниде кровь и вода изъ ребръ Владычень на главу Адамову и омы вся грехы рода человеча. И есть разселина та на камени том и до днешняго дне. Знати есть на десней стране Распятиа Господня знамение то честное.
О МЕСТЕ ЛОБНЕМ
Есть Распятие Господне и камен-ет святый озданъ стеною все. Горе над распятиемъ создана комара хитро, исписана мусиею дивно. И от встока лиць на стене написано есть мусиею — Христос на кресте распят — хитро и дивно, прям яко живъ, и вболе и възвыше, якоже был тогда. А полудне лиць написано есть снятие такоже дивно. Двери же имат двои. Възлести же есть горе по степенемь: до дверей 7 степеней, а въ двери вшед 7 степеней. Помощено же есть мраморными дъсками красными.
Споди же под Распятиемъ, идеже есть глава, такоже приздано есть яко церквица мала, и красно исписана есть мусиею и помощена есть красным мрамором. Да то зовется Крайниево место, еже есть Лобное место. А горе, идеже есть Распятие,— то зоветь Голгофа. А отъ Распятия Господня до Снятия есть сажень 5. И ту есть у Распятия Господня близь место къ полунощию лиц, идеже разделиша ризы его.
