Си же вся от ангела реченая к мюроносицам о Христе съказахомъ.
Похвалим ныня Иосифа приснопамятнаго, благообразьнаго же и досточюдьнаго. Блажен еси поистине, преславьный и досточюдьный Иосифе, толика блага и велика богатьства на земли и на небеси сподоблься! Достойно послуживъ, яко и херовими, Божию телеси; нъ они невидимо на своею дьржаще раму, страхомь своя покрывають лица, ты же радуяся на своею руку Христа Бога носил еси. Блажен еси, Иосифе, паче патриарха Аврама, Исака и Якова![367] Его же бо они глас точию слышавъше, чьстьнии и славьни паче всехъ явишася, того же ты в плащаницю обил еси тело. Блажю руце твои, Иосифе, на нею же Сына Божия и всехъ творца дьржалъ еси тело; его же образа не тьрпя зрети въ Хориве Моиси;[368] под каменьем скрывъся слыша: «Задьняя моя узриши»; тема и на Фаворе с Илиею видевъ Христа,[369] послушьствоваста того суща Бога — и человека. Блажен еси паче Давыда цесаря, великый Иосифе! Давыд бо от Силома кивот съ Божиемь словом принесе,[370] нъ въ своемь убояся поставити его дому; ты же не скинию с Закономь, нъ самого Бога прием от крьста, въ своемь гробе радуясь положил еси. Блажен и преблагословенъ тобою, Иосифе, ископаный гроб, въ немь же полежа Христос Спас наш! Уже бо несть гроб, нъ престол Божий, олтарь небесный, покоище Святаго Духа и одр небеснаго цесаря, о немь же рече Соломон: «Стоять сильнии ратоборьци, изучени брани, имуще оружия обоюдуостра»; си глагола назнаменуя святых чины, борющихъся съ еретикы и съ жиды по Христе. Блажен еси, Иосифе, съвершителю Божию таиньству и пророчьскыхъ гаданий раздрешителю! О немь же бо заклон и пророци притчами написаша, сего ты явьствьно измюрною по святым мазаше язвам. Блажен еси, Иосифе, иже вся ожививъшаго словомь и водами покрывъшаго твердь небесную, Сего, яко мьртвьца, каменемь покрыл еси въ гробе, чая тридневнаго въскресения! Блажен убо и град твой Аримафей, из него же ты приде послужит Сыну божию! Кую похвалу створим достойну твоего блаженьства, ли кому уподоблю сего праведника? Како начну или како разложю? Небомь ли тя прозову? Нъ того светьлей бысть благочьстьемь, ибо въ время страсти Христовы небо помрачися и свой светъ скры, ты же тогда радуяся на своею руку Бога носяше. Землю ли тя благоцветущую нареку? Но тоя честьней ся показа; тъгда бо и та страхомь трясашеся, ты же с веселиемь божие тело съ Никодимомь въ плащаницю съ вонями обив положил еси. Апостоломь ли тя именую? Нъ и тех вернее и крепъчею обретеся; еда бо они страха ради жидовьска разбегошася, тъгда ты без боязни и бесумнения послужил еси Христови. Святителя ли тя и старейшину прозову? Тем бо образ своея служьбы предал еси, обиходя и кадя и кланяяся съ молитвами пречистому телу Христову глаголя: «Въскресни, Господи, помози нам, избави нас имени Твоего рали!» Священномученикомь ли тя нареку, яко толику показал еси любовь къ Христови? Аще бо и не въгрузися в твоя пьрси оружие, ни прольяся твоя от меча кръвь, нъ изволением и верою по Христе положил еси душю. Поразили бо тя быша и на удеса расекли, нъ съхрани тя от техъ Исус, его же ты храняше тело, не убоявъся гнева жидовска, ни прещения жречска, ни напрасно убивающих войн не устрашися, не пожали си по мноземь богатстве, не родив ни о своемь животе, чая тридневнаго въскресения. Нъ паче всехъ святых подвизалъся еси, богоблаженый Иосифе, и паче всехъ имаши дерзновение къ Христу, къ нему же молися и о нас, хвалящих тя, и чтущих твою с мюроносицами память, и твой украшающих праздьникъ.
