».
Сь же рече: «
Дамъ залогъ»; она же рече: «Перьстенъ твой, и гривну, и жезлъ, иже въ руце твоей, дай ми». И да ей, и влезе к ней. И зача от него. И въстав отиде. И свергши же она ризы своя утвореныя и облечеся в ризы вдовьства своего. Пусти же Иуда козлище от козъ своих рукою Дамасита, пастуха своего, и взяти залог от жены. И не обрете ея Дамасит, и вопроша муж населникъ, где есть любодеавшия. Они же реша: «Несть зде любодеи». Бысть же по третьемь месяци, поведаша Иуде: «Съблуди Фамара, невеста твоя, и се имать въ чреве от блуда». И рече Иуда: «Изведите ю, да ю уждегуть». Ведоме же ей, посла къ свекру залог, глаголющи: «От негоже человека есть се, и от того же и азъ имею въ чреве, познай, чий есть перстнь, и гривна, и жезлъ сий». И позна и Иуда и рече: «Очистися Фамара, зане не дах ея Силому, сыну моему, и не приложи по томь прилепитися ей».
[253]Смотри же, како ти въземлеть Фамара от Иуды залог, не мьзды хотящи, но мнящи, яко ту абие от совокуплениа и детородиа украдет. Ти аще бы сего залога не взяла, то смертию бы от Иуды осуждена бывши умерла, не бы бо веровал Иуда словесем ея, яко от него зача въ чреве. Но вижь, како ти посылаеть к нему глаголющи: «Чий есть залог си». И познавъ Иуда перьстень свой, и гривну, и жезлъ, рече: «Очистися Фамара» и, осудивый ю прежде смертию, слыша, яко согреши, увидевъ же пакы свое совокупление, уже оправдаеть ю и очищаеть, зане не да ея Силому своему.
Греху бо и осуждению последуеть смерть,[254] правде же и очищению последуеть живот. Того ради Фамара оправдася. И тако, заченши, роди плод, образ Закону и Благодати, Зару и Фареса. И бысть егда приближися время рождению ея, Зара прежде выложи руку. Ждющаа исхожедениа ея повяза тому червлену вервь на руку, таче оному руку вовлекши, таче изыде Фаресъ,[255] среда бо есть Фарес преже бывших благочестию и хотящих быти Благодати. Почто же Зара вложи ру[ку], преже да же не изыде Фарес? Не якоже ли образ бяше благочестию и Благодати? Тем же, руку извлек, показа благочестие, иже сотвори Авель, и Сифъ, и Енофъ, Ной же, и Авраамь. Червленая же вервь образ бяше кровий приносимых жертвъ теми яже к Богу. И тако рукою показавъ: прежняя отдавает Закону изыти преже, рекше, Фаресу; таче изыде Зара. Сию образ бяше, та провозвестила двоихь люди, Фарес убо — израильскых, Зара же — иже от языкъ.
И виждь, како ти оправдается Иуда и Фамара яко не прелюбодейства ради се створи или уставити хотяще разгорение похоти. Аще бы сего похотела, не бы поискала Иуды, многим мимоходящим. Но от того племене похоте разрешити узы своего бещадиа. Аще ли бы тоа плод от мнимыа скверненыя тоя нечистыа похоти и безакониа былъ, кроме смотрениа Божиа, то не бы и Богъ тоя плодом прообразовал великаго своего смотрениа тайну хотящую быти, но да сотворить обавление, якоже отбегшее и отползъшее естество и отвалившееся въ безаконныа сласти, приде его исцелить Христос, и тому бежащу, ять и, отдалившуся от Бога, и к себе, приближивь, его приведе.
