Избави и того и на свою землю съдрава възврати и пакы.
Не по мнозе же времени отрекъся всего житья сего, седе на единомъ месте и без молвы, собе самому токмо внемля. И на утрии дьнь ничтоже не оставляя, нъ нищимъ раздаяше все, на Бога печаль възметая, иже ся и всеми на всякъ дьнь печеть.
Единою же на Святыи дьнь слузе его тужащю, яко ничтоже не имамъ на сеи дьнь чьстьнъ. Онъ же рече ему: «Препитавыи инъгда израилиты в пустыне, тъ имать дати и намъ сде пищю. Нъ шедъ призови поне 5 нищихъ мужь, чая Божия помощи». И яко бысть обедняя година, тъгда принесе некто мужь бремя всея яди и 10 златникъ. И Богу хвалу възда о всех сихъ.[74]
Въ Олимбъ[75] же шедъ къ Мефодью брату своему, начать жити и молитву творити беспрестани къ Богу, токмо книгами беседуя.
Чтение 3
Придоша же съли къ цесарю от казаръ,[76] глаголюще, яко: «Испьрва единъ токмо Богъ знаемъ, иже есть над всеми. И тому ся кланяемъ на въстокы, а обычая своя ины студныя держаще. Евреи же устять ны веру ихъ и дела прияти, а срацини, на другую страну, миръ дающе и дары многы, стежать ны на свою веру, глаголюще, яко наша есть вера добреиши всехъ языкъ. Тъ сего ради сълемъ къ вамъ, старую поминающе дружбу и любовь держаще, языкъ бо велии сущь, от Бога цесарство держите. И вашего совета въпрашающе, просимъ же мужа книжна у васъ. Да аще преприть еврея и срацины, то по вашю ся веру имемъ».[77]
Тогда възыска цесарь Философа и изъобреты и, сказа ему козарьскую речь, глаголя: «Иди, философе, к людемъ симъ. Створи имъ ответъ и слово о Святеи Троици с помощию ея, инъ бо никтоже не можеть сего достоино створити». Онъ же рече: «Аще велиши, владыко, на сицю рець радъ иду пешъ и босъ и безъ всего же, егоже не веляше Богъ учьникомъ своимъ носити». Отвещавъ же цесарь: «Аще се ты бы хотелъ о собе створити, то добрее ми глаголеши. Нъ цесарскую дерьжаву ведыи и чьсть, честьно иди съ цесарскою помощию». Тъгда же пути ся ятъ. И дошедъ Хорсуня,[78] научися ту жидовьскы и беседе и книгамъ, осмь частии грамотикиа преложь и от того разумъ въсприимъ.
Самарянинъ[79] же етеръ ту живяше и, приходя к нему, стязашеся с нимь. И принесе книгы самареискы[80] и показа ему. И испрошь я у него, Философъ затворися въ храме, на молитву ся наложи. И от Бога разумъ приимъ, чести нача книгы бес порока. Узревъ же самарянинъ, възпи великымъ гласомъ и рече: «Воистину, иже въ Христа верують, въскоре Духъ Святыи приемлють и благодеть». Сыну же ся его крьщьшю тогда, и самъ ся по немъ крьсти.
