и отиде в дом свой радуяся.
Чюдо 7-е
Человекъ некто во граде Казани, именем Исак, прореклом Бык, некоторыя вдовы сынъ, именем Улиты, верны сущей, боящейся Бога, на посаде проскурни[43] верховных апостолъ Петра и Павла, и бысть в раслаблении полтретия годы. Болезнь же его бе всем знаема живущим окрестъ: неможаше велми ногами, и до полу.
И посла матерь свою к чюдотворному образу Пречистыя Богородицы молебная пети. Сам же убо в дому своем на одре лежаще, и начат со слезами предо образомъ плакати и молитися Пресвятей Богородицы, дабы ему самому видети чюдотворный Богородицын образ. И в том часе виде себе мало легчайши от болезни; и абие, милостию Пречистые Богородицы, востав о собе на ногах и начат помалу поступати. И вземъ два посоха, и абие, подпираяся ими, поиде в монастырь к чюдотворному всемилостивому Богородицы образу.
О великих ти чюдес, Богородице! Матери со слезами о сыну молящися, сынъ же ненадежно и самъ в монастырь прииде! Мати же его виде и изумися, и едва во ум прииде, и нечаемое известно уведе. И приложиша к слезам слезы, молящеся Богородицы о исцелении, и тако до конца получи здравие. И воздаша хвалу и славу Господу Богу и Пречистей Богородицы, месяца апреля въ 30 день, отойдоша во свой дом, хваляще и славяще Бога, творящего дивная и преславная чюдеса.
Чюдо 8-е
Жена некоего пришелца Полоцкаго, попа Григория, живяше в селе в Тагашеве (тако бо звашеся место то), именем Елена, бысть же болна очима три лета. И абие убо от многия тоя болезни и зрак отъяся, яко уже не видети ей нимало. И услыша убо многая и преславная чюдеса от иконы Пречистые Богородицы во граде Казани, и пойде во град к чюдотворному образу милости просити. И еще убо ей не дошедши града Казани яко седми поприщ,[44] и абие внезапу узре свет очима, и мнетися ей, яко николиже ими болна бе. И пришед в монастырь к чюдотворному образу, хвалу воздаде Господу Богу и Пречистой Богородицы.
Чюдо 9-е
Поведа нам инокъ Иосиф, иже ныне погребный ключник в дому Пречистыя, тогда же живя въ Троецком монастыре, иже въ Казани.[45]
Бысть, рече, болети ему очима, яко ни мала света видети, и абие обещася молебная пети Пресвятей Богородицы. И егда приидоша священицы с чюдотворным Пречистыя образом в день недельный в соборную церковь Пресвятыя Богородица честнаго и славнаго ея Благовещения к молебну, Иосиф же у чюдотворнаго образа во время молебнаго пения моляся прилежно, и не получи исцеления, и отиде скорбен. И абие возлеже отъ болезни, и сведен бысть в сон тонок. И видит икону Святыя Богородицы, и бысть ему
