Братия же, не могуще без пастыря быти, и избравше единого от ученикъ святаго, мужа, в добродетелехъ сияюща, Саву[114] именемъ, и того возведоша на игуменство. Он же приемь паству и добре пасяше порученное ему стадо, елико можаше, и елико отца его, блаженнаго Сергиа, молитвы спомогаше ему; шестому же лету съвръшившуся, и тъй паству остави. Братия же паки приходятъ къ блаженному Никону, молящи его паки восприяти паству своего достояния. Чюдный же онъ мужъ, во всемъ смирение изволяа, не рачаше начальства и власти отвращашеся: сведяше бо благоразумный, яко легчайше и удобнейше къ спасению, еже наставлятися от инехъ, паче неже самому наставляти; якоже и от древнихъ уставлено бысть. И отрицашеся, недостойна себе глаголаше быти таковаго великаго дела, братия же не престаше моляще его. Онъ же зело тяжко си творяше власти величество, такоже и сего любезнаго безмолвия, якоже матере оттръзаем, боляше. Они же наипаче со многими слезами глаголюще: «Не подобно ти, — рече, — быти, отче, еже себе единому ползы сматряти, но паче и ближним ко спасению».[115] О сем же преподобный размышляа беаше, ведяше бо, яко и о промышлении братии каковы суть мзды. И сего ради вся възлагаетъ единому Богу, могущему вся съвершити, еже безмолвиа сохранитися доброму и еже о предстательстве мьзды не оставлену быти, пакы приемлеть игуменьство. И отлучаетъ себе часть коегождо дне, еже единъ единому Богу предстояти, и текущими от очию без щука слезами лице си омываше.
Съй же ему даръ умиления благотворное смирение подастъ, и се имяше озарение и просвещение уму. Излитие же слезъ его, иже въ молитве, толико множество бе, яко всему лицу его и рясномъ опаленомъ быти! Непоколебим же образомъ пребываа въ предстоянии молитвенемъ в нощных и дневных славословиихъ и смыслъ в себе крепце уставляа. И се имяше дело прилежно, еже всяко проходити Писание, отеческая словеса испытуя, и каяждо от сихъ в себе воспоминая, творити сих усердьствоваше, понеже многу сладость от нихъ приимаше. И сихъ делма закону оного и нраву мнози ревноваху и подражати тщахуся, елико мощно.
В таже времена слышашеся безъбожнаго Едегея[116] нашествие съ прочими варвары на русскую землю, и бяше все православие во страсе велице зело утесняемо. Блаженный же Никонъ умнии свои очи на небо возведъ, купно же и руце, во своемъ правиле в нощи моляшеся и молитвы своего отца призываше, воеже и тому молитву прострети ко общему владыце Христу, яко да не предастъ в запустение место оно от безбожных агарянъ. Сему же бываему, седъ мало почити от труда, и аки в сонъ тонокъ сведенъ бысть, и явишася ему пресветлии светилницы, велицыи иерарси Петръ и Алексий
