О архиепископе Ионе.
[103]По сих же по времени пресвященный архиепископъ Великого Новаграда и Пьскова владыка Иона приходит в монастырь, и у гроба блаженаго бывъ и, та молебнаа совершивъ, повеле святаго образ написати на иконе, такоже и канон и прочаа в славу превеликому и чюдному Господу Богу и Спасу нашему Исусу Христу, прославляющему и по преставлении святыа своя.
О том же Андреи.
Ниже убо сие посещение, бывающее святым его, молчаниемь минути. Сие бо чюдо, подобно пръвым, потребно есть исповедати. Якоже прежде рехом предреченному Андрею сынъ, именемь Моисий, случися ему студеною болезнию одержиму немаловредно, паче три лета тако стражуще в том злом недузи. И от сего родитилие того Моисиа, видяще по вся дни тако тому стражуще, болми паче оного утробою болезнено, яко о чаде скорбяху. Но третиему лету приходящу, и юже болезни множащися во отроци, но благъ советъ того отець восприемь, повелелеваеть вести того в монастырь, идеже блаженыи Сава лежаше. Тамо не по мнозех временех дарова ему Богъ исцеление, и бысть здравь молитвами святаго Савы. Видевше же того родители преславное чюдо святаго и прославиша Бога и того угодника. Оттоле же болми веру стяжа к монастырю, идеже блаженый Сава лежаше.
О Иоанне, одръжимь трясавицею и исцелевшем от гроба святаго.
Ниже есть сие праведно — умлъчати святаго чюдо бывшее. Случися некоему человеку одержиму быти трясавицею, именуемому Иоану. И тому от болезни зело стражущю, и приходит в монастырь Вознесениа Господа нашего Исуса Христа, идеже труды блаженаго отца Савы создани, в немже и лежат честныа его мощи. И тамо молитвовавъ, святаго на помощь призываше, еже облегчити болезненое тому, и целовавъ гробъ святаго, и иде в келию — болезни тому стужающи. По семь усну и видить себе во сне в некоторых светлых храмех бывающих, и свет ис полудневной стране светящь, и освети храмину ту, в нейже человекъ той лежаше. Явися ему блаженый Сава и с нимь некий мужъ, яко мнети мирянин. Явися мирянин болному, яко той преподобный есть Сава. Видить же и некую жену зело злообразну и хотяше ухватити болнаго, ей же возбрани святый, глаголя: «Не прикасайся к тому прочее». И тако жена она исчезе от очию их. И от того часа болный бысть здравъ. Возбнув же от сна, благодаря Бога и Святаго, и отиде в домъ свои здравъ, радуася.
О Устиане и о видении святаго.
Иное же таково прилучися некоему человеку, именем Устиану, одержиму быти трясавицею. И обетъ положи къ Богу — на год поститися, ни мяса ясти, ни пива пити. Побежаем же верою еже къ преподобному Саве прииде же в монастырь, идеже блаженый Сава лежит. И тамо ему бывшу молящуся, здравиа своему недугу прося, и видить, яко во сне, яко тутенъ некий страшенъ от гроба святаго, и по сем видит некоего светоносна отрока, отвръзаа гробъ преподобнаго. Тогда виде некоего зело злообразна мужа, черна и перната, и устрашае болящаго. Предреченый же светоносный отрокъ укрепляет болнаго, глаголя: «Не устрашайся злообразнаго того, яко бесъ есть». Яко обличенъ бысть демонъ, и к тому невидим бысть. И яви же ся ему и некий благообразенъ старець, и сказает и предстоай отрокъ, яко той есть святый Сава. И ако сие услыша болный, бысть зравъ, и благодаряше Бога и святаго Саву.
