О Андреи и о сыну его.
Ниже и се да умолчано будет, иже Богъ творить святыми своими, обаче бо божественаа благодать не токмо в животе прослави святыа своа, но и множае и по преставлении, да уверятся вси и познают, яко Господь нашь Исус Христос славящаа его прославляеть, ищющи его обрящуть благодать. Сице же и зде случися.
Бяше некии купець в том же славнем велицем Новеграде, именем Андрей, богат имениемь и добродетелию, богатейший же верою ко святым. Сей убо предреченный Андрей веру имый монастырю честнаго его Вознесениа Господа нашего Исуса Христа и к великому въ пророцех Предтечи Иоанну, к преподобному отцю Саве, егоже именованиемь Савинъ монастырь наречеся. Темже и той Андрей часто тамо в монастырь прихождаше, и молитвовавъ, и трапезу братиамь представляаше, и милостыню давъ, возъсвоа возвращашеся.
Случи же ся ему по обычаю приити в монастырь къ празднику Сбору Иоанна Крестителя,[101] имяше же и сына с собою, именемь Василиа, пятым летом суща; тамо же тому Василию ходящу и молебнаа совершающим. Ненавидяй же добра диаволъ хоте предреченному Андрею спону сотворити и скорбнаа принести тому, не терпяше бо зрети того, толику веру имуща ко святому. Темьже своими козньми запят сына его Василиа с высоты низверже. Видев же человекь той нечаемо о сыне своемь, зело оскорбеся, умръша бо того мняше. Воскочивше же со свещами тамо, егоже умрьша быти мняху, но ходатайством Предтечи и молитвами Савы здрава его обретоша, и ничтоже пострадавша, но паче радующися. Видевши же преславнаа, вси прославиша Бога и великого Предтечю Иоанна, и преподобнаго отца Саву. Темже тогда братию учредивь и милостыню давь, радостию великою возвратися, славя и хваля Бога и его угодника отца Саву.
О настоятели тоя же обители.
Иже убо и сие истинна, обаче всемь ясно глаголатися, яко да и о сих всегда Богъ прославляется, иже святыа своа преславно прославляет, якоже и самаа повесть о сем скажеть.
В том же монастыри Вознесениа Господа нашего Исуса Христа, идеже блаженый Сава лежаше, настоятелю тоя же обители, именемь Геласию,[102] случися ему отравою болети. И изнемогающю ему, и блаженаго Саву моляше, еже молитвеное о нем къ Богу приносити. Уснувше ему нечто мало от болезни, и видить блаженаго Саву во одежи преславне, образом къ церкви на молитве стояща. И от сего видениа предреченый игуменъ болезни пременися и бысть здравъ, яко николиже болевъ. Возбнув же от видениа, радовашеся, Бога прославляа, творящему дивнаа святыми своими угодникы. И приходит же во град ко архиепископу, и исповеда ему о видении, паче же о исцелении своемь.
