Библиотека литературы Древней Руси. Том 12 (XVI век) | страница 41
И абие устремляется къ вечернимъ странам, рекше къ Угромъ,[33] многа места и грады пусты сотворивъ. И бяше видети втораго Навходоносора, град Божий Иерусалимъ воююща;[34] съй же злейши и губителнейши оного, грады испровергая, села же и места пожигая, человеки же закалаа, и инех же пленяху. И бе пророческое слово събываемо, зряще: «Боже, приидоша языци в достоание Твое и оскверни церковь святую Твою».[35] И пакы: «Положиша трупиа рабъ Твоих — брашно птицам небеснымъ и плоти преподобных Твоихъ — зверемъ земнымъ».[36] Темже иже тогда все человечество, вси плакаху, вси въздыхааху, и вси «увы!» възывааху. Инии же глаголаху: «Почто не умрохомъ, яко прежде бывшеи человеки?! Да быхомъ сих золъ не видели. И понеже быхомъ грешнийши, паче онехъ, яко такова злаа постигоша нас?» Нъ никтоже бе утешаяй, не бо человеческое бяше бываемое, но отъ Бога попущаемо грехъ ради наших.
Сим же тако бывающимъ, достижеть онъ гневъ Божий и до самого Великаго Варадина, града угорьскаго,[37] той бо среди Угорьскиа земля лежить, древесъ простыхъ мало имущи, но много овощиа, изъобилиа же и вина. Град же весь водами обьведенъ, и от сея крепости не боящеся никогоже. Среди же града столпъ стоя, зело превысокъ, елико удивляти зрящих на нь.
Бе же и тогда самодерьжець тоя земля краль Владиславъ,[38] угромъ же, и чехомъ, и немцемъ, и всему Поморию,[39] даждь и до Великаго моря.[40] Бяху же угры первие въ православии, крещение отъ грекъ приимше,[41] но не поспевшимъ своимъ языком грамоту изложити; римляном же, яко близъ сущимъ, приложиша их своей ересе последовати. И оттоле даждь и до днесь бываетъ тако.
Предреченный же краль Власловъ, и той такоже пребывааше, римъской церкве повинуяся, доньдеже приде к нему Сава святый сербьский архиепископъ, и сему паки сотворяетъ приступити к непорочней и христианьстей вере гречестий, не явленно, но отай, бояше бо ся въстаниа угровъ на ся. Пребысть же святый Сава, поучая его о православии, месяць 5, и тако отходит въ своя си, единаго священника оставивъ у него, и того тако пребывающа, якоже единого от служащих.
Той же, оканныхъ оканнейши царь Батый, пришед въ землю, грады раздрушая и люди Божии погубляа. Самодеръжцу же Власлову, егоже святый Сава именова Владислава, не поспе собратися с людьми своими далечаго ради землям растоаниа, тогда же благополучное время Батый обретъ, творяше, елика хотяше. Той же самодержець, видевъ гневъ, пришедший на всю землю, плакаше, не имый что сотворити; на многы дни пребысть, ни хлеба, ни воды вкушаше, но пребывааше на предреченномъ столпе,