Тако же и тъй благочестивый великий князь Андрей царьское имя своею храбростию стяжа. Бе бо зело съдружебенъ греческому царю Мануилу. Некогда убо има случися въ единъ день изыти на брань: единому изъ Царяграда — на срацины, а другому из Ростова — на блъгары. И велию победу сътворишя, и празньство светло уставишя Господу нашему Иисусу Христу — Происхожение Честнаго Креста, месяца августа в 1 день.
Борис же не исправися по стопамъ праотца своего ходити, темъже и с начяльством и душю си повреди, еже и светлому Михаилу съвещеваше недобре. Доблий же страдалець диаволя сети, яже усты несмысленыхъ другов поляцаше ему, якоже паучинныа мрежа растръзая, прямо смерти — жизнь иже въ Христе, и за тленную красоту — Небеснаго Царствиа красоту полагаа, и за богатство погыбнущее — съкровища нетленныа, за увядающую славу — божественую славу въспоминая, за сладость же жизни — бесмертныа жизни наслаждение, и вся противу настоящих недвижимаа поставляа, и прельстящихся въ познание съгрешеныхъ приводя, овоже млъчанием ласкателемъ уста загражая. И чюдный же синглитикъ Феодоръ еуангельскаа словеса въспоминаше, стройне беседуя несмысленымъ княземъ, чювьство прегрешению ихъ дая, Михаила же от силу в силу възводя. Исполнь бо сый Духа, ибо «ратника объоружаетъ Духъ», по святому словеси.
Сице великый Михаилъ на съпостаты възимаяся, единоплеменныя же безумьствующая князя окая, предающихъ истину благочестиа страха ради на лжу, отвсюду же самъ непреклоненъ и незыблемъ въ благочестии стоя. И в сихъ мучителемъ на биениа простретися мученикъ повелеваемъ. Преже сановному поясу отыяту бывшу, егоже, варивъ, на лица повръже любящих привременную лесть, симъ показаа свою храбрость и души свободное дръжавою помысла благочестива.
Обнажену же и по земли протяжену страстотръпцю, многы раны по телеси приемлющу, кровь же, струями изливающися, землю обагряше. Обаче светлым лицемъ Михайло зрящим на нь являшеся, яко въ чюжемъ телеси страсти тръпяше, и подвигом подвиг венчаа, светле благодарениа Владыце и Господеви въспущаше. Тако великий князь Михаилъ мученическыми добротами светяся, трипобедными одоленьми венчяваем. Подобает уже Христову въину трехрабровавшу Подвигоположнику своему явитися и от него почьстий натрижнениа своего насладитися. И како да въстечетъ? Преславне да взыдет, не токмо съвръшене победникъ явлься, но и дары принося Подвигоположнику и Владыце своему.
И понеже не умягчаем страстотрьпець ранами, ясно бо въпиаше: «Да не будеть когда христианину-мужу огнь влъхвованиа проходити, ниже на немъже наречено есть истиннаго Бога имя — покланятися кусту; ниже Троичнаго препетаго единьственаго естьства поклонником — почитати видимое сие солнце!» Мучителемъ же единаче неослабно святому плоть съдробляющем и крови лиющися, тъй же не ослабе, ни охужаяся. Каганови же разумиа вся доблесть святаго, надлъзе же не трьпя, сверепый, мужества святаго, на смерть осужаетъ мученика: поистине же — къ вечному животу препущаще и.
