Аще началъ бы бысть сповествовати вам, но многа быти хотяше беседа, многа же и скръбь ваша душа приати хочеть въспоминаниемъ плачевных повестей, древле бывшихъ. Обаче же зрю и ныне въ нас вины происходяща тыя же, от нихъже и тогда плачь и скръбь она родися несътрьпимыя беды. Сповемъ же, яко бы не зело протяженне, ниже бы пакы вся мимотещи. Но малым словом явленна вашей любви предложу: непщую бо пользу быти, не глаголи же и добрейшихъ събытиа — на лучьшаа нрава преложениемь.
Первое бывшаа нам, о сынове русстии, не не весте, яже от Бога въ земли нашей благодеяниа при светлейшемъ Владимире, иже и Василии, велицемъ князе,[18] мужи апостольсте и отци нашемъ по духу: божественую глаголю благодать, еюже вся Руси великаа земля къ богоразумию възведеся, просвещьши преже начяльника ея, великаго князя, имъ же свои спасъ земли, его излиа. Сего великаго Владимира, иже Василие, сихъ ради Господь Богъ благословеньми веньчя и почте его чядъ множествомъ ему, из нихъже велиции князи и властеле, местници же и градодръжци, по приатию рода, яко отечествомъ, Русию владычьствоваху.
Оставих глаголатися о светилу оною чюдную, самобрату и мученику святою Романа и Давида, еже Борисъ и Глебъ еста:[19] сии бо здешнее дръжавьство неприемным изменше, еще въ мягце възрасте прекроткаго пастыря Христа словеснаа овчята суще, русскаго плодоношениа начятокъ Господеви избранне.
Многыми же леты снабдящу Господу Богу семя преподобнаго своего Василиа и на престоле его сыны сыновъ его по преатию роду посажающу. Елма же умножишася князем сынове, умножишася и областиа, съумножи же ся в них и зависть, къ симъ же и вельможьство им възрасте, и съвъзрасте вельможству гръдость. Прииде же и богатства изъобилование въ съкровища ихъ, и съвниде богатьству неправда. И тако им величающимся и путий Господнихъ, якоже лепо, не смотряющимъ, — еже и пророку иудеомь о сихъ иногда порицающу, — дондеже сътвердися в нихъ триплетенная она злоба.
Вемъ, порицати вамъ, и зазирати нам о сихъ, и полагати неискусство слову: иная же начавшу, негли же иная посреде вносящу. Длъготрьпя же паче послушати молю вам! Аще праве судите, ниже ныне инаа глаголю, ибо свыше обещахся повести дати, сие и полагаю, истинну повествуя.
Откуду святымъ симъ еже мучитися и еже церковным поборником быти и како многых венцевъ натрижнение ихъ? Отсюду бо их светлости есть обличитися. И аще она мину и напасть ону, юже Русь пострада от Батыя, умлъчю, ниже и церкви ясно сказати възмогу. Како же и вы мученическую светлость видите? Но нужда надлежить ми, повествующу несътрьпимыя оны напасти, откуду и что ради бышя, и како обиать всю землю и церковь, вмале вся обличити. Темъже и кротце внимати молю вся, глаголемая ныне.
