от Михайлова Чюда[84] одръ, и положиша тело его на одре.
И егда же преставися князь великий, тогда начаша его нарежати старцы осифовские, а великого князя стряпчих[85] отслаша. И тогда начаша у него пети заутреннюю и его дьяки крестовые с протопопомъ, и часы,[86] и каноны, и погребанию канонъ, и вся отпеша, якоже бе при живомъ. И тогда поиде к нему народ много прощатися, и боярские дети, и княжата, и гости, стряпчие погребные[87], и все людие, которые не быша у него; и бысть плачь и рыдание во всех людех велие.
Наутрия же, в четвергъ, на 1-мъ часу дни, Данил митрополит повеле звонити в болшой колокол.
Бояринъ жо его Михайло Юрьевичь, поговоря с митрополитомъ и з братьею великого князя, и з бояры, и повеле во Арханьгиле ископати гроб подле отца его, великого князя Ивана Васильевича, противу дверей Семиона Летопровотца.[88] И поговоря с митрополитомъ, Михайло Юрьевичь послаша по постельничиво Русина Иванова, сына Семенова, снемъ с него меру, и повеле ему гроб привести камен.
Тогда же приде Данил митрополитъ и с нимъ владыка Васиян Коломенский и Дософей Крутицкой, а иные же владыкы быша тогда во своих областех, понеже не поспеша; архимандриты же тогда быша: чюдовский Иона, симановский — Филофеи, андроновский — Зосима, игуменъ троицкый, игумен осифовский, игумены московские все, протопопы московские и все священницы. Тогда же пришедше братъ его, князь Юрьи и князь Андрей Ивановичи, и бояре все, и весь народ, плачюще и рыдающе горко, и повеле тогда диякомъ его любимымъ, певчимъ большой станицы,[89] стати во дверех у комнаты, и начаша пети «Святый Боже», болшую.
Тогда взяша тело великого князя, инока Варлама, старцы троецкие и осифовские, и понесоша его на головах, и вынесоша его в преднюю избу. И бысть слез и рыдания множество в людех, которые его не видеша. И понесоша его на крилцо, и за нимъ грядуща со свещами и с кандилы, поюще «Святый Боже». И какъ понесоша его на площадь, ино бысть слез и рыдания от народа, якоже и звону в колоколы не слышать, якоже земли востонати. Великую же княгиню Елену несоша ея изъ ее хоромъ в санях на собе дети боярские на лествицу, а с нею шли бояре: князь Василей Васильевичь Шуйской, Михайло Семенович Воронцов, князь Михайло Лвовичь Глинской, князь Иван Федорович Овчина; боярыня же тогда бысть с великою княгинею князя Федора Мстиславского княгиня Анастасия, племянница великого князя, да княжь Иванова Даниловича Пенково княгини Марья, да боярыня Ивана Ондреевича жена Челядина Олена, да Василия Ондреевича жена Огрофена, да Михайла Юрьевича жена Феодосия, да Василья Ивановича жена Огрофена, да княжь Васильева жена Лвовича Глинского княгини Анна.
