И ны́не: Лютых мя мук, и тьмы кроме́шныя и геенны Твоими молитвами свободи́, Де́во, и́маши бо волю и силу, Господа рождшая Еди́наго Преблагаго.
Седален, глас 2-й
Душу связав любовию Христовою и земная возненавидев вся, мудре, водворился еси́, отче преподобие, в пустынях и горах, разумнаго древа вкусив, славне, ангельски просиял еси́. Те́мже и мрак проше́д плоти своей, тьму отгнал еси́ бесов, Паи́сие, йнокующим первый, моли Христа Бо́га грехов оставление подати чтущим любовию святую память твою.
Сла́ва Отцу́ и Сы́ну и Свято́му Ду́ху, и ны́не, и при́сно, и во ве́ки веко́в. Ами́нь.
Богородичен: Скорый покров, и помощь, и милость покажи на рабе Свое́м, Чистая, и волны укроти суетных помышлений, и падшую мою ду́шу возстави, Богоро́дице, вем бо, вем, я́ко можеши, елико хощеши.
Песнь 4
Ирмос: Услыша пророк пришествие Твое́, Го́споди, и убояся, я́ко хощеши от Девы роди́тися и человеком яви́тися, и глаголаше: услышах слух Твой и убояхся, сла́ва силе Твоей, Го́споди.
Припев:Преподобие отче Паи́сие Вели́кий, моли Бо́га о нас.
Законострадальческое житие от мягких ногтей восприе́м, богомудре Паи́сие, даже до конца пребыл еси́, я́ко Божественен доблественник, вене́ц приял еси́ победы от всех Царствующаго, молитвами своими избавляти от муки грешники, от них же первый есмь аз, не забуди мене́.
Припев:Преподобие отче Паи́сие Вели́кий, моли Бо́га о нас.
Имуще тя молитвенника крепка, блаже́нне Паи́сие, и обе́щника[5] печальным, предстателя, и поборника, и ходатая благочестна, от всяких спасаемся бед, напастей и обстояний.
Сла́ва: Ве́лию судеб бездну име́яй, Той тебе рече́: се, бо даю ти дар, да вся е́же просиши от Отца Моего во Имя Мое́, дастся тебе, о коем-либо грешнице помолишися, вставятся греси́ того: сего ра́ди припадаю тебе, отче Паи́сие, имея бездну согрешений, да отпустит твоими молитвами, иже тебе обетова, я́ко Благ и Человеколюбец.
И ны́не: Глагол провещай, егда право имам суди́тися, Богороди́тельнице, к Сы́ну Твоему, Пренепорочная, да обрящу Тя тогда прибежище и заступление, мук всех избавляющи.
Песнь 5
Ирмос: От нощи утреннююща, Человеколюбие, просвети, молюся, и настави и мене на повеления Твоя́, и научи мя, Спасе, творйти волю Твою.
Припев:Преподобие отче Паи́сие Вели́кий, моли Бо́га о нас.
Постом удручая тело свое́ отче Паи́сие, иногда по причащении Тела и Крови Христовы, я́ко Ангел се́дмьдесять дней без пищи теле́сныя пребыл еси́, Божественную державу неизрече́нную имея, и возмог в себе животную содержати силу благодатию, паче пи́щнаго укрепления, сла́ва державе Твоей, Го́споди.
