А переменит Бог Орду, дети мои не имут давати выхода в Орду, и которыи сын мои возмет дань на своем уделе, то тому и есть. А что есмы подавал своеи княгине волости и села из уделов детии своих, и свои примысл, и слободы, и села, и Холхол, и Заячков, а с тех волостии, и с слобод, и с сел что возмет княгини моя, то еи и есть. А дети мои в то не вступаются.
А ис тех волостии, и слобод, и сел, чть есмь вымал у детии своих из уделов, а подавал княгини своеи, а кому будет жалоба сиротам на волостели, и тем людем учинит исправу княгини моя. А дети мои в то не вступаются.
А что есмь дал сыну своему, князю А ндрею, Заберегу, за то дети мои вси дают оброк святому Спасу пятнадцать рублеи на год на Спасов день.
А се благословляю детии своих. Сыну моему старишему, князю Василью: икона Парамшина дела, чепь золота, что ми дала княгини Василиса, пояс золот велики с каменьем без ремени, пояс золот с ременем Макарова дела, бармы, шапка золота.
А сыну моему, князю Юрью: пояс золот новыи с каменьем, с жомчюгом без ремени, пояс золот Шышкина дела, вотола сажена.
А сыну моему, князю Ондрею: снасть золота, пояс золот старыи новгородскии.
А сыну моему, князю Петру: пояс золот с каменьем пегии, пояс золот с калитою да с тузлуки, да наплечки, да алам.
А сыну моему, князю Ивану: пояс золот татаур, да два ковша золоты по две гривенки.
А что ся останет золото, или серебро, или иное что но есть, то все моеи княгини.
А что ся останет стад моих, тем моя княгиня поделится с моими детми по частем.
А кто будет моих казначеев, или кто будет моих дьяков прибыток мои от мене ведал, ил посельских, или тиунов, или кто женился у тех, те все не надобе моей княгине и моим детем.
А приказал есмь свои дети своеи княгине. А вы, дети мои, слушаите своее матери во всем, из ее воли не выступаитеся ни в чем. А которыи сын мои не имет слушати свое матери, а будет не в ее воли, на том не будет моего благословения.
А дети мои молодшая, братыя княжы Васильевы, чтите и слушаите своего брата старишего, князя Василья, в мое место, своего отца. А сын мои, князь Василии, держыт своего брата, князя Юрья, и свою братью молодшюю в братстве, без обиды.
А кто моих бояр имет служити моеи княгине, тех бояр, дети мои, блюдите с одиного.
А кто сю грамоту мою порушит, судит ему Бог, а не будет на нем милости Божии, ни моего благословенья ни в сии век, ни в будущии.
А писал есмь сю грамоту перед своими отци: перед игуменом перед Сергием, перед игуменом перед Савастыяном.
