20. А которым людем доведется о судных своих и о иных каких делех бити челом государю, и тем людем о тех своих делех челобитныя свои подавати в приказех бояром и околничим и думным и всяким приказным людем, кто в котором приказе ведом. А будет ему в приказе суда не дадут, или против его челобитья указу ему не учинят, и ему о том бити челом и челобитныя подавати государю, и то в челобитных своих описывати, что он о том деле напередь того в приказе бил челом, а указу ему в приказе не учинено. А не бив челом в приказе, ни о каких делех государю никому челобитен не подавати. А будет кто учнет о каком деле бити челом и челобитные подавати государю в приказе не бив челом, и таким челобитчиком за то чинити наказание, бити батоги. А кто почестнее, и того посадити в тюрму на неделю, чтобы на то смотря иным неповадно было так делати.
21. А которые люди после суда учнут приносити к судным делам подъписные и неподъписные челобитные, а в тех челобитных напишут прибылыя статьи для пополнки судного дела, чем бы им быти правым, а в суде у них тех статей не было, и у них таких подъписных и неподъписных челобитен к судным делам не приимати, а вершити те дела по тому, как будет в суде записано.
22. Да и судиям после суда своим вымыслом в судном деле никому по дружбе, или по недружбе сверх того, что в суде истец и ответчик говорили, ничего не прибавливати, ни убавливати, и у исца и у ответчика писменых ссылок и никаких писем после суда не приимати, опричь того, что в суде подано, и что в суде же в писменых и в словесных ссылках какия крепости будут объявлены. А которые крепости на суде истец или ответчик в писменых, или в словесных своих ссылках объявят, а на суде их в то время не положат, и их про те крепости допрашивати в суде же, где у них те крепости. Да будет скажут, что у них те крепости на Москве, и им те крепости велеть положить вскоре. А будет они скажут, что у них те крепости в городех, и им в тех крепостях дати поверстной срок по государеву указу. А подьячему велеть судное дело против исцовых и ответчиковых речей написав, положити на стол к вершению вскоре, а вдаль никаких судных дел не откладывати. И которые дела доведетца вершити обчими ближними ссылками и крепостьми и крестным целованием, и те дела вершити безволокитно. А по которым делам доведетца послать в городы обыскивать, и государевы грамоты к воеводам и приказным людем посылати по тому же вскоре безо всякого мотчанья, и велети в городех сыскивати, и обыски из городов присылати вскоре же. А как из городов обыски пришлют, и ис тех обысков для вершенья судного дела велеть выписать на перечень, и по обыском судные дела по тому же вершити вскоре, чтоб никому в судных делех лишние волокиты и убытков не было.
