Припев: Святи́и му́ченицы, моли́те Бо́га о на́с.
Све́тлы себе́ от крове́й ри́зы му́ченических обложи́сте,/ совле́кшеся и́стинно тле́емаго греха́ми челове́ка/ и воспева́юще; Го́спода по́йте, дела́, и превозноси́те Его́ во вся ве́ки.
Оби́льнаго све́та светоли́тиями,/ Со́лнца мы́сленнаго Боже́ственными светлостьми́, му́ченицы, освеща́еми,/ нощь претеко́сте безбо́жия,/ пою́ще единомышле́нием души́: / Го́спода по́йте, дела́, и превозноси́те Его́ во вся ве́ки.
Я́ко а́гницы, я́ко нескве́рныя ю́ницы,/ я́ко боже́ственныя голуби́цы, я́ко самово́льна заколе́ния,/ приведо́стеся, му́ченицы, Зижди́телю,/ и я́ко же́ртвы непоро́чны, согла́сно пою́ще:/ Го́спода по́йте, дела́, и превозноси́те Его́ во вся ве́ки.
Повеле́нием мучи́телей пребеззако́нных непра́ведную подъя́сте смерть,/ на у́ды ссеца́еми, па́лицами сокруша́еми,/ неми́лостивне бие́ми, огне́м всесожига́еми, мече́м посека́еми;/ тем безсме́ртная прия́сте с ра́достию бога́тная воздая́ния.
Припев: Пресвята́я Богоро́дице, спаси́ нас.
Богоро́дичен: Во след Тебе́ теко́ша жены, мν́ра благово́ннаго ве́дуще,/ Всечестна́я Богоневе́сто,/ еди́на Неискусобра́чная,/ из утро́бы Твое́й возсия́вшаго Единоро́днаго Сы́на,/ и с Тобо́ю ца́рствуют и́стинно, песносло́вяще Христа́ во ве́ки.
Ин. Ирмо́с: На горе́ святе́й просла́вльшася/ и в купине́ огне́м Присно де́вы/ Моисе́ови та́йну я́вльшаго,/ Го́спода по́йте// и превозноси́те во вся ве́ки.
Припев: Преподо́бне о́тче Симео́не, моли́ Бо́га о нас.
От вся́каго отлучи́вся пристра́стия/ и ма́терню не́мощь уще́дрив,/ я́ко живе́й яви́лся еси́ по сме́рти:/ Го́спода по́йте и превозноси́те Его́, вопия́, во ве́ки.
Ю́ношу стя́гнул еси́ разслаблена/ и одр Фи́ларху повелевавши на ра́му нести́, свяще́ннейше, вопия́:/ Го́спода по́йте и превозноси́те Его́ во вся ве́ки.
Благослови́м Отца́ и Сы́на и Свята́го Ду́ха, Го́спода.
Уясни́вый И́ова стра́стию,/ согни́вшия пло́ти твоей гни́лость в би́сер претвори́ многоце́нен,/ тя, Христо́в уго́дниче Симео́не, Сла́вяй во вся ве́ки.
И ны́не,Богоро́дичен: От А́нгела ра́дость прие́мшую,/ и ро́ждшую Го́спода сла́вы,/ и свет мíру возсия́вшую,/ вси Тя пое́м, Де́во Богоро́дице, во вся ве́ки.
Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.
Катава́сия: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во/ и огнь в ро́су претво́ршее/ и превозноси́те всем жизнь подава́ющаго// Ду́ха Всесвята́го во ве́ки.
Иере́й же, покади́в святу́ю трапе́зу, возгласи́т:
