О побоищи на рецена Воже[199]в Рязанской земли. Въ лето 6886. <...> Того же лета ординский князь, поганый Мамай,[200] събравъ воя многы и посла Бегича[201] ратью на князя великаго Дмитрея Ивановичя и на всю землю Русскую.
Се же слышав, князь великий Дмитрей Иванович събравъ воя многы и поиде противу их в силе тяжце. И, переехавъ за Оку, вниде в землю Рязаньскую и сретошася с татары у реки у Вожи, и стояху, промежу собою реку имуще.
Не по мнозех же днех татарове переехаша на сю сторону и, удариша в кони свои, и скочиша вборзе и, нюкнуша гласы своими, и поидоша на грунах и ткнуша на наших. И удари на них: съ едину сторону Тимофей околничий, а съ другую сторону князь Данилей Пронскый, а князь великий удари в лице. Татарове же в том часе повергоша копья своя и побегоша за реку за Вожю, а наши после за ними бьючи их, и секучи, и колючи, и убиша их множество, а инии в реце истопоша. А се имена избитых князей: Хазибей, Коверга, Карабулукъ, Костровъ, Бегичка.
По сих же приспе вечеръ, и заиде солнце, и смерьчеся светъ, и наста нощь, и бысть тма, и нелзе бяше гнатися за ними за реку. А на завьтрее бысть мъгла велми велика. А татарове тако и побегоша еще сущи с вечера и чрес всю нощь бежаху. Князь же великий на заутрие уже перед обедом поиде за ними следом ихъ, и погнаша их убежавших далече. Обретоша бо в поле повержены дворы их, и шатры их, и вежи[202] их, и юртовища их, и алачюгы,[203] и телеги их, а в них товаръ безчислен весь пометанъ. А самех не обретоша — бяху бо побежали к Орде.
Князь же великий Дмитрей възвратися оттуду на Москву с победою великою и рати роспусти съ многою корыстью. Тогда убьенъ бысть Дмитрей Монастыревъ да Назаръ Даниловъ Кусакова. Се бысть побоище прилучися месяца августа 11 день, на память святаго мученика Еупла диакона, въ среду при вечере. И поможе Богъ князю великому Дмитрею Ивановичю, одоле ратным и победи врагы своя, и прогна поганых татаръ.
И посрамлени быша окааннии половци,[204] възвратишася съ студом, без успеха, нечестивии измалтяне,[205] побегоша гоними гневом Божиим! Прибегоша в Орду къ своему царю, паче же къ пославшему Мамаю, понеже царь их, иже в то время имеаху себе, не владеаше ничимже[206] и не смеаше ничтоже сътворити пред Мамаем, но всяко старейшиньство съдержаше Мамай и всеми владеаше в Орде.
Видев же Мамай изнеможение дружины своея, прибегшее к нему, а иныя избиты князи, и велможи, и алпауты, и многыя воя своя изгибша. И разгнева же ся зело Мамай и възъярися злобою. И тоя же осени, събравъ останочьную силу свою и съвъкупи воя многы, поиде ратью въборзе, без вести, изгономъ на Рязанскую землю. А князь великий Олегъ
