В ЛЕТО 6800.
[116] УБИЕНИЕ БЛАГОВЕРНОГО И ХРИСТОЛЮБИВАГО ВЕЛИКОГО КНЯЗЯ МИХАИЛА ЯРОСЛАВИЧА,
[117] МЕСЯЦА НОЯБРЯ ВЪ 22 ДЕНЬ
Благослови, отче.
Венецъ убо многоцветенъ всякимъ украшениемъ и всякимъ цветочным видящимъ его очима многую светлость подастъ. Кииждо убо взора своего видениемъ влечетъ к собе: ово белым образомъ цветочнымъ просвещается, ин же черленым и багряным и зело точнымъ лице имея; а въ едином совокуплении смесившимся от многъ арамат чюдоносную воню испущающе благоухания, изимающе злосмрадие от сердца верных. Сице убо жития имеющих велие усвоение къ единому Богу, желающе, како угодия ему сътворити, киимъ доити и видети горний Иерусалимъ: овии же отложше плотскую немощь, постомъ и молитвами в пустыняхъ и в горах, в пешерах изнуряюще тело свое и венецъ, и перфиру, и весь санъ своего суньклитства временнаго, ничтоже вменяюще, оставляаху, токмо единого Христа любящи въ сердци и желающе нетленнаго царства, но еще тело свое предаша на поругание узамъ, и темницам, и ранам, конечное, кровь свою проливающе, въсприимаху царство небесное и венецъ неувядаемый. Яко же сей крепкий умомъ и терпеливый душею блаженный и христолюбивый великий князь Михайло Ярославичь свое царство, уметы вменивъ, остави, приятъ страсть нужную, положи душу свою за люди своя, помня слово Господне, еже рече: «Аще кто положит душу свою за други своя, сей великий наречется въ царствии небеснемъ».[118] Сии словеса измлада навыче от Божественаго Писания, положи на сердци си, како бы пострадати. Нам же сеи не от инехъ слышавше, но сами бывше честному его въспитанию и добронравному възрасту его и премудру разуму усерднаго к Богови усвоения.
