В лето 6860. Рукописание Магнуша, короля свейскаго. Се язъ, князь Магнушь, король свейский, нареченый въ святомь крещеньи Григорий, отходя сего света, пишу рукописание при своемъ животе, а приказываю своимъ детемъ, и своей братьи, и всей земли Свейской: не наступайте на Русь на крестномъ целованьи, занеже намъ не посабляется.
Первие сего подьялъся местерь Бельгерь[101] и шелъ в Неву, и срете его князь великий Александръ Ярославич на Ижере-реце,[102] и самого прогна, а рать его поби.
И потом брат мой Маскалка, вшедъ в Неву, городъ постави на Охте-реце[103] и посадникы своя посади съ множествомъ немець, а самъ поиде за море. И пришед великий князь Андрей Александрович, город взя,[104] а наместники и немець поби.
И потом было намъ розмирие с Русью[105] 40 лет.
И потом за сорок лет с великимъ княземъ Юрьемъ Даниловичемъ взяли есмя миръ вечный[106] на Неве, земли есмя и воде учинили розделъ, кому чем владети, и грамоты есмя пописали и попечатали.
И потом за 30 лет,[107] язъ, Магнушь-король, того не порядя, поднялся есмь съ всею землею Свейскою, и вшед в Неву, и взя город Ореховъ и наместники есмь свои в городе посадилъ, и съ ними неколко силы моей оставих, а самъ есмь пошелъ за море. И потомъ новогородци пришед, город свой взяли, а наместниковъ и немець побили, которыи сидели в городе.
И язъ, того не порядя, за одинъ годъ, опять пошелъ к Орехову[108] съ всею Свейскою землею; и стрети мя весть, что новогородци под Ореховцемъ. И язъ опять пошел под Копорью,[109] и под Копорьею есмь ночь ночевал; и весть ко мне пришла: новогородци на украе земли. И язъ послышевъ, побеглъ за море; ино в валу парусовъ не знати; и въста буря силна, и потопи рати моей много на усть Неровы-рекы.[110] И пошелъ есмь в землю свою съ останкомъ рати.[111]
И от того времени наиде на нашу землю Свейскую погыбель: потопъ, моръ, голодъ и бысть сеча межди собою. У самого у мене Богъ отъя умъ, и седех в полате год прикованъ къ стене чепию железною и заделанъ есмь был в полате.
И потомъ приехалъ сынъ мой Сакунъ из Мурманьской земли,[112] и выня мя ис полаты, и повезе в землю свою Мурманьскую. И удари на мене опять потопъ, корабли мои и люди мои истопи ветръ, а сам сътворихся на дне корабленемъ, и с торцнемъ[113] пригвоздихся, три дни и три нощи. И по Божию повелению, принесе мя ветръ под манастырь святаго Спаса в Полную реку,
