Да се есть путь к Тивириаде: а от Иерусалима до кладязя святыя Богородица верстъ 10; а от кладязя того до Гельвуньских горъ суть версты 4. И на тех горах Гелвуньских убиенъ бысть Саулъ, царь июдейскый, и сынъ его Анафанъ ту же убиен бысть.[189] И суть же горы велики, камены сухи, безводны, несть бо росы на них никогдаже.[190] А горъ тех до кладязя Давыдова есть верстъ две; а от кладязя того до пещеры Давыдовы суть версты 4. В той пещере дал бяше Богъ Саула царя в руце Давыдови, и не уби его, оному спящу, но уреза скуть окройнища его и взя мечь его и покровъ ручный.[191] А от тех горъ до Сихемьских горъ и до рова Иосифова суть версты 4. И на тех горах сынове Ияковли пасяху стада отца своего Иякова; та те горы прииде Иосифъ Прекрасный къ братьи своей, от отца своего посланъ к ним, нося им миръ и благословение от отца своего Иякова. Они же, видевше брата своего Иосифа, вставше и яша и, и ввергоша и́ в ровъ,[192] иже и до днешняго дне есть ров-отъ, яко и стена глубока создана камением великым, и твердъ велми. И ту угоди ны ся ночьлегъ лежати на месте том. Есть бо место то близь пути людскаго, на правой руце, тамо идучи.
О КЛАДЯЗИ ИАКОВЛИ
И оттуда до вси Иосифовы, иже нарицаеться Сихарь, есть верстъ 10. И ту есть кладязь Ияковль, глубокъ и великъ, и вода студена зело и сладка. И у того кладязя Христос беседовал с женою самарянынею.[193] И ту лежахом ночьлегъ.
О САМАРИИ
И ту есть близь град Самариа яко полверсты вдалее от кладязя того. Град же Самариа великъ есть велми и обиленъ есть всем добром. Град-от Самария стоитъ межи двема горама высокима, источници воднии мнози студени посреде града того текуть красно. И древеса овощная бе-щисла ту суть всяка: смокви, орешие и рожци, масличие, яко дубравы, яко леси суть по всей земли той окоо Самария. По краемъ нивы многоплодовиты суть по полем темъ. И есть земля та около Самариа красна и чюдна зело. И есть место то обилно всем добром: маслом и вином, пшоницею и овощомъ. И просто рещ, оттуда есть живъ Иерусалимъ всемъ добром. И тъ ныне град Самарийский зовется Неаполи. А оттуда есть место, двою версту к западу лиць от града Самариа, имя место тому Севатополи; и есть ту градокъ малъ созданъ, и то есть темница святаго Иоанна Крестителя Христова; и в той темници усеченъ Иоаннъ Предтеча Христовъ от Ирода царя.[194] И ту есть гробъ святаго Иоанна Предтеча, и есть на месте том церковь создана добра во имя Предтеча Иоанна. И есть ныне ту манастырь фряжьский, богат зело.
